काठमाडौं (हाम्रो खेलकुद)- जनकपुर नाइट्स अपराजित रहँदै केबी साम नेपाल कबड्डी लिग (एनकेएल) को फाइनलमा प्रवेश गरेको छ।

विराटनगर सोमवार ब्यान्डिट्सलाई ३४-३२ को झिनो अन्तरमा हराउँदै जनकपुर फाइनलमा पुग्ने पहिलो टोली बन्यो।

राष्ट्रिय खेलकुद परिषद्को कभर्ड हलमा भएको पहिलो क्वालिफायर नाटकीय बन्यो। पहिलो हाफमा जनकपुरले एकपक्षीय दबाब बनायो।

२३-१२ को अग्रता बनाउने क्रममा जनकपुरले विराटनगरलाई दुई पटक अल आउटको सफलता प्राप्त गर्यो। विराटनगर स्कपर जिड्न संघर्षरत थियो। उसले पहिलो हाफमा बोनसबाट ६ तथा टच र ट्याकलबाट ३/३ स्कोर गर्यो। जनकपुरले टचबाट मात्र १२ स्कोर गरेको थियो।

पहिलो हाफमा ११ स्कोरको अग्रता बनाएको जनकपुरले दोस्रो हाफमा यो लयलाई निरन्तरता दिन सकेन। विराटनगरले जनकपुरलाई कडा चुनौती दिंदै खेललाई २६-२३ सम्म पुर्यायो। यो क्रममा एक पटक विराटनगरले जनकपुरलाई एक पटक अल आउट पनि गर्यो।

दोस्रो हाफको नौ मिनेट सकिंदा जनकपुरले मात्र ३ स्कोर गर्यो। विराटनगरले भने ११ स्कोर जोड्यो। खेल प्रतिस्पर्धात्मक बन्यो। ३०-२९ सम्म विराटनगरले खेललाई पुर्याए पनि जित दर्ज गर्न सकेन। ३४-३२ ले खेल जनकपुरले जित्यो।

जनकपुरको लागि च्याफोन कामुन्नरले ११ स्कोरको योगदान दिए। नाफोदिन पोन्टाइसङले सर्वाधिक १९ स्कोर गरे। तर पनि विराटनगरलाई जित दिलाउन सकेनन्।

जनकपुरलर जारी लिगमा विराटनगरलाई हराएको यो दोस्रो पटक हो। लिग चरणमा भने जनकपुरले विराटनगरलाई ४०-३८ ले हराएको थियो।

यसअघि जनकपुर २३ अंक सहित लिग चरणमा शीर्षस्थानमा रहँदै क्वालिफायरमा पुगेको हो। जनकपुर अपराजित एक मात्र टोली हो। उसले लिग चरणमा ४ खेल जित्दा काठमाडौंसँग बराबरी खेलेको थियो।

अब विराटनगरले धनगढी वाइल्ड क्याट्स र हिमालयन रेडर्सबीचको खेलको विजेतासँग दोस्रो क्वालिफायर खेल्नेछ।