काठमाडौँ (हाम्रोखेलकुद)- प्रथम महिला अन्तराष्ट्रिय तेक्वान्दो प्रतियोगिता अर्को महिना आयोजना हुने भएको छ। काठमाडौँ स्तिथ दशरथ रंगशालाको कवर्ड हलमा चैत्र २३ र २४ गते आयोजना हुने प्रतियोगिता नेपाल तेक्वान्दो संघ अन्तर्गत महिला शसक्तिकरण समितिले आयोजना गर्ने लागेको हो।
सिनियर र जुनियर गरी विभिन्न ९ तौलसमूहका १३ स्पर्धामा तथा पुम्सेमा ४ विधामा प्रतिस्पर्धा हुनेछन् । जुनियरमा ४०, ४२ र ४४ तथा सिनियरमा ४६, ४९, ५३, ५७, ६२ र ६७ केजी तौलसमूहमा प्रतिस्पर्धा गराइने आइतबार राजधानीमा आयोजित पत्रकार सम्मेलनमा जानकारी दिईयो। पुम्सेमा यु–१५, यु–१९ र प्लस १९ र समूहगततर्फ खेलाडीले प्रतिस्पर्धा गर्नेछन्। प्रतियोगितामा सातौं राष्ट्रिय खेलकुदका स्वर्ण विजेताले प्रतियोगितामा भाग लिन पाउने छैनन् ।
प्रतियोगितामा ६ राष्ट्रका करिब १ सय ६९ खेलाडीहरुले सहभागिता जनाउने छन् जसमा २० जना महिला निर्णायकहरुले खेल संचालन गर्ने प्रतियोगिता संयोजक नन्दा बस्यालले जानकारी दिईन। प्रतियोतिगामा फाईट र पुम्सेका लागि जम्मा १३ स्वर्ण पदकका लागि प्रतिस्पर्धा हुने छ। अनुमानित ४५ लाख रुपयाँ खर्च रहेको प्रतियोगिताका लागि विभिन्न संघसस्था, प्रायोजक र शुभ चिन्तकबाट आर्थिक सहयोग जुटाईने आयोजकले जानकारी दिएको छ।
