पोखरा (हाम्रो खेलकुद)- ललितपुर क्विन्सले एभरेष्ट महिला भलिबल लिग (इडब्लुभी) मा लगातार तेस्रो जित हासिल गरेको छ।

निरिह लुम्बिनी लाभाजलाई ३-० को सोझो सेटमा माथ दिँदै ललितपुरले ९ अंक जोडेको छ। यो हारमा लुम्बिनीको फाइनलमा पुग्ने संभावना समाप्त भएको छ।

पोखराको बहुउद्देश्यीय कभर्ड हलमा ललितपुरले खेलमा एकपक्षीय पकड बनायो। लुम्बिनीले दोस्रो र तेस्रो सेटमा केही चुनौती दिए पनि ललितपुरले नतिजा आफ्नो पक्षमा पारेको थियो।

राष्ट्रिय टोलीकी कप्तान तथा सेटर अरुणा शाहीलाई पहिलो खेलमा चोट लागेपछि लुम्बिनी दबाबमा छ। उनको अनुपस्थिति यो खेलमा पनि खट्कियो।

ललितपुरले २५-१३, २५-२० र २५ -२१ को सहज जित आफ्नो पक्षमा पार्यो। शतप्रतिशत जित निकालेको ललितपुरले कर्णाली याशविस जतिकै समान खेलबाट ९ अंक बनाएको छ।

यो सँगै ललितपुरको फाइनल पुग्ने संभावना बलियो बनेको छ। ललितपुरले यसअघि मधेश युनाइटेड र काठमाडौं स्पाइकर्सलाई सोझो सेटमा हराएको थियो।

तेस्रो खेल खेलेको लुम्बिनीको दोस्रो हार हो। पहिलो खेलमा कर्णालीसँग हारेको लुम्बिनीले हिजो दोस्रो खेलमा पोखरा निन्जाजलाई ३-२ को सेटमा हराएको थियो।

३ खेलबाट लुम्बिनी २ अंक छ‌। उसले बाँकी दुई खेल सोझो सेटमा जितेको खण्डमा ६ अंक जोड्नेछ। यदि दुई जित संभव भए पनि उसको अंक ८ मात्र पुग्नेछ।

आज भएको पहिलो खेलमा कर्णालीले काठमाडौंलाई हराएको थियो। भोलि पहिलो खेलमा कर्णाली‌ र मधेश तथा दोस्रो खेलमा ललितपुर र पोखराबीच हुनेछ।