काठमाडौं (हाम्रो खेलकुद)- नेपाल भलिबल संघले बंगलादेशमा हुने काभा मेन्स नेसन्स कप २०२५ को लागि राष्ट्रिय भलिबल टोलीको घोषणा गरेको छ।

संघको ५७औं कार्यसम्पादन समितिको बैठकले राष्ट्रिय टोली छनोटको जिम्मेवारी प्रशिक्षकलाई दिने निर्णय अनुसार १४ सदस्यीय टोलीको घोषणा गरिएको हो।

संघले असोज २ गतेदेखि प्रशिक्षणमा रहेका खेलाडी मध्येबाट अन्तिम चरणको छनोट असोज २३ र २४ गते गरेको पनि जनाएको छ।‌

सेन्ट्रल एसियन भलिबल संघ (काभा) को स्वीकृति तथा बंगलादेश भलिबल फेडरेसनको आयोजनामा कात्तिक ५ देखि ११ गतेसम्म प्रतियोगिता हुनेछ।‌

तर यो पटकको खेलाडी छनोट निकै विवादित बनेको थियो। पहिलो चरणमा १८ खेलाडी छनोटमा गण्डकी प्रदेशका एक जना पनि नपर्दा छनोट समिति निकै आलोचित बनेको थियो। गण्डकीले निर्णय नसच्चाए घरेलु प्रतियोगिता नखेल्ने चेतावनी दिएको थियो।

प्रशिक्षक जगदीश भट्टले सामाजिक सञ्जालबाट अब संघले दिएको सबै जिम्मेवारीबाट विश्राम लिने बताएका थिए। लगत्तै संघले यो निर्णय फिर्ता लिन अनुरोध गरेको थियो। यसपछि संग र प्रशिक्षक भट्टले यो विषयमा दुवैले कुनैपनि जानकारी गराएको छैनन् ।

नेपाली राष्ट्रिय भलिबल टोली

धन बहादुर भट्ट क्षेत्री, धिरज काजी बस्नेत, सुनिल बोहोरा, पहल गहतराज, शरण सामरी क्षेत्री, शैलेन्द्र यादव, विनोद चन्द, अर्जुन नेपाली, सफल वि.क., रविन नगरकोटी, नृपध्वज बस्नेत, हरि हजुर थापा, सुजन सुनार, सन्तोष राई ‌।