काठमाडौं (हाम्रो खेलकुद)– नेपाली चेसका उदयीमान खेलाडी सुमित पन्तले राजधानीमा जारी एसियन जोनल ३.२ चेस प्रतियोगितामा ठूलो सफलता प्राप्त गरेका छन् । १९३५ रेटेड सुमितले पाँचौं चरणको खेलमा बिहीबार ग्रान्डमास्टर (२४७४ रेटेड) एमानुएल हुेसनलाई हराएका छन् । सुमितले पहिलो चरणमा आइएम अबु सफियन सकिललाई हराउदै प्रतियोगिताको सुरुआत गरेका थिए । बिहीबारको सफलतापछि सुमितको ३.५ अंक पुगेको छ ।
सुमित पन्त
नेपाल बुद्धिचाल संघ र नेकोस चेस एकेडेमी क्लबको संयुक्त आयोजनामा जारी प्रतियोगितामा बंगलादेशी ग्रान्डमास्टर नियाज मुर्साद र अब्दुल्ला अल रकिब ४ चारसहित संयुक्तरुपमा शीर्षस्थानमा छन् । नियाजले पाँचौ चरणमा शीर्ष वरियताका बंगलादेशी ग्रान्डमास्टर जिआउर रहमानलाई हराए । जिआउर सहित सुमित ,केशव श्रेष्ठ तथा बंगलादेशी फीडे मास्टरद्वय हसन मेहन्दी र सहमान सायद मुजफुरको समान ३.५ अंक छ ।
नेपालका पूर्व राष्ट्रिय च्याम्पियन २०७७ रेटेड केशवले पाचौ चरणमा बंगलादेशका अन्तराष्ट्रिय मास्टर २३४३ रेटेड अबु सफीयन सकिलसँग बराबरी गरे । बंगलादेशका २२६३ रेटेड हसनले १८४८ रेटेड भगवती प्रसाद शर्मालाई हराए ।
पाचौ चरणमा बराबरी गरेका फीडे मास्टर रहमान मोहम्मद तैबुर र हिमाल लामाको समान ३ अंक छ । श्रीलंकाका कालुगम्पीटीया आरएस,मदनकृष्ण कायस्थ र क्षितिज भण्डारीको पनि ३ अंक छ । आरएसले सुमन राइ, मदनले आशिष फुयाल तथा क्षितिजले मिलन लामालाई हराए ।
महिला तर्फ बंगलादेशी डब्लुआइएम हमिद रानी लागातार पाचौ जित हात पार्न सफल भएकी छिन् । १९९० रेटेड हमिदले पाचौ चरणमा बंगलादेशकै डब्लुएफएम १९०४ रेटेड नजराना खानलाई माथ दिइन् । डब्लुआइएम २०७७ रेटेड समिमा अख्तर ४ अंकसहित दोस्रो स्थानमा छिन् । उनले बंगलादेशकै डब्लुएफ १९९८ रेटेड सुल्ताना सरिन सिरिनलाई हराइन् ।
श्रंीलंकाकी साउमी जैनेब र बंगलादेशकी डब्लु सिएम मोहमुदा हक चौधरीको साथमा अर्की बंगलादेशी खेलाडी सरमिन समिहा सिमीमीको समान ३ अंक छ । जैनेबले शान्ता थापा तथा चौधरीले मतीना कुसीलाई हराइन् । समिमीले सिन्दिरा जोशीलाई र सबिना श्रेष्ठले पुनम प्रसाइलाई हराइन् ।
