काठमाडौं (हाम्रो खेलकुद) – नेपाल तेक्वान्दो संघले ‘लेट्स विल्ड दि फ्युचर विथ तेक्वान्दो’ भन्ने मुल नारासहित विभिन्न अनाथ आश्रममा रहेको करिब २ सय ५० बालबालिकालाई १० महिने निशुल्क प्रशिक्षण सुरु गरेको छ ।
विश्व तेक्वान्दो महासंघको सहयोगमा संघले विभिन्न आठ आश्रममा रहेका २ सय ५० बालबालिकालाई १० महिनासम्म विशेष प्रशिक्षण गराउने छ । तेक्वान्दो संघले ‘लेट्स विल्ड दि फ्युचर विथ तेक्वान्दो’ भन्ने मुल नारासहित अनाथ बालबालिकालाई निशुल्क प्रशिक्षण गराउन लागेको हो । प्रशिक्षण सोमबारबाट सुरु भएको छ । प्रशिक्षणमा पाँच वर्षभन्दा माथिका बालबालिकाको सहभागिता रहेको छ ।
नेपाली तेक्वान्दोका कीर्तिमानधारी खेलाडी दिपक विष्टले अनाथ बालबालिकालाई तेक्वान्दोमार्फत कसरी देशको नाम राख्न सकिन्छ भनेर नै अनाथ बालबालिकालाई तेक्वान्दोको विशेष प्रशिक्षण दिने प्रयास गरेको बताए । ‘यो भन्दा अघि संघले पारा तेक्वान्दोलाई विशेष प्रशिक्षण दिएको थियो । पारा तेक्वान्दोले अन्तर्राष्ट्रिय पदक दिलाएको छ ’ विष्टले भने, ‘उनीहरुलाई हामीले विशेष प्रशिक्षण दिनेछौ अनाथ बालबालिकामा पनि अन्तर्राष्ट्रिय पदक जित्ने क्षमता छ ।’
यस्तै विष्टले विशेष प्रशिक्षणमा राम्रो प्रदर्शन गर्ने अनाथ बालबालिकालाई राष्ट्रिय टिममा समावेश गरिने जानकारी दिए । उनले भने, ‘प्रशिक्षण पनि यी खेलाडीलाई जिल्ला देखि राष्ट्रिय स्तरको प्रतियोगिता खेलाउने छ ।’ कार्यक्रमको उद्घाटन युवा तथा खेलकुद मन्त्री दलजित विके श्रीपाइलीले गरेका थिए ।
