काठमाडौं (हाम्रो खेलकुद) – नेपाली खेलाडीले जर्मनीमा आयोजना हुने विश्व टेबलटेनिस च्याम्पियनसिपमा प्रतिस्पर्धा गर्ने भएका छन् । ४ खेलाडीसहित ५ सदस्यीय नेपाली टोली शनिबार त्यसतर्फ प्रस्थान गर्दैछ ।
मे २९ देखि जुन ५सम्म हुने प्रतियोगितामा २ महिला र २ पुरुष खेलाडीले नेपालको प्रतिनिधित्व गर्नेछन् । पुरुषमा शिवसुन्दर गोथे र अमरलाल मल्ल तथा महिलामा नवीता श्रेष्ठ र स्वेच्छा नेम्वाङले च्याम्पियनसिपमा चुनौति पेश गर्नेछन् ।
टोलीको व्यवस्थापकमा नेपाल टेबलटेनिस संघका अध्यक्ष चतुरानन्दराज वैद्य छन् । अध्यक्ष वैद्यले त्यस दौरान विश्व टेबलटेनिस महासंघको साधारणसभामा पनि भाग लिने बताइएको छ ।
नेपाली खेलाडीले सिंगल्स, डबल्स र मिक्स डबल्समा प्रतिस्पर्धा गर्नेछन् । टोलीलाई अन्तर्राष्ट्रिय मान्यता प्राप्त नेपाल ओलम्पिक कमिटीका अध्यक्ष जीवन राम श्रेष्ठले शुक्रबार विदाई गरे ।
