काठमाडौँ (हाम्रो खेलकुद) – जर्मनीको डस्सलडर्फ सहरमा सुरु भएको विश्व टेबल टेनिस च्याम्पियनसिपमा नेपालले मिक्स डबल्समा जितका साथ यात्रा प्रारम्भ गरेको छ ।
बंगलादेशका खेलाडीसँग प्रतिस्पर्धा गर्दै नेपाली टेबल टेनिस खेलाडी अमर मल्ल र नविता श्रेष्ठ (दायाँतर्फ) । तस्बिरः चतुरानन्द राजवैद्य
नेपाली अमर मल्ल र नविता श्रेष्ठको जोडीले बंगलादेशका महबुब बिल्लाह र मौमिता अलामको जोडीलाई ३–० को सोझो सेटमा हराएको जर्मनीबाट नेपाल टेबल टेनिस संघका अध्यक्ष चतुरानन्द राजवैद्यले जानकारी दिएका छन् ।
एकतर्फी खेलमा नविता र अमरको जोडीले ११–३,११–५ र ११–७ सहज जित निकालेको थियो । नविता र अमरले आजै दोस्रो चरणको खेल खेल्नेछन् ।
यही प्रतियोगिताका दौरान बुधबार अन्तर्राष्ट्रिय टेबल टेनिस महासंघको निर्वाचनमा भाग लिन अध्यक्ष राजवैद्य टोलीसँगै जर्मनी पुगेका छन् ।
