काठमाडौं (हाम्रो खेलकुद)– नेपालका नम्बर एक गल्फ खेलाडी शिवराम श्रेष्ठले सिजनको छैटौं उपाधि जितेसँगै सूर्य नेपाल टुर २०१६/१७ बिहीबार सम्पन्न भएको छ । सूर्य नेपाल टुरको अन्तिम प्रतियोगिताका रुपमा रहेको प्रिमियर गल्फ च्याम्पियनसिप शिवरामले जितेका छन् । सिजनको छैटौं उपाधि जितेका शिवरामको खेल जीवनको भने यो ३६ औं उपाधि हो ।

उपाधिका साथ शिवराम श्रेष्ठ ।

उपाधि जित्नाका वावजुद उनले आफ्नो प्रदर्शनलाई अहिले सम्मकै खराब भएको बताए । ‘आजको सुरुआत नै राम्रो भएन,’ उनले भने,‘मेरो दिनको पहिलो सर्ट बिग्रेपछि लगातार विग्रन्छ । आज मैले जति खराब खेले त्यो भन्दा खराब सूर्यप्रसाद शर्माले खेले जसका कारण मैले उपाधि जिते ।’

पार–७२ को गोकर्ण गल्फ क्लबमा बिहिबार च्याम्प्यिनसिपको अन्तिम दिन शिवरामले सुर्य प्रसाद र सन्जय लामामाथि ३ स्ट्रोकको अग्रतासहित जित हासिल गरेका थिए । शिवरामले बिहीबार खराब प्रदर्शन गर्दै चार ओभर ७६ स्कोर कार्ड बनाएपनि समग्रमा ३ स्ट्रोकको जित हात पारे ।

सूर्यले अन्तिम दिन दुई ओभर ७४ स्कोरको खराब प्रदर्शन गरे । सूर्यसँगै संयुक्त रुपमा दोस्रा भएका सन्जयले भने १ अन्डर ७१ को कार्ड बनाए । शिवरामले चौथो दिनसम्म कुल १४अन्डर २ सय ७४ को कार्ड बनाउँदा सूर्य र सन्जयले समान ११ अन्डर २ सय ७७ को प्रदर्शन गरे । उपाधिसहित शिवरामले २ लाख २० हजार रुपैयाँ प्राप्त गरे ।

५ स्ट्रोकको अग्रताका साथ चौथो दिनको खेल सुरुआत गरे शिवरामले फ्रन्ट नाइनमा खराब प्रदर्शन गर्दा सूर्यभन्दा ३ स्ट्रोकले पछि परे । तर ब्याक नाइनमा सूर्यले तुलनात्मक रुपमा झनै खराब खेलेपछि शिवरामलाई उपाधि जित्न सहज भएको थियो ।

फ्रन्ट नाइन सम्मको खेलमा उपाधि नजिक पुगेका सूर्यले ब्याक नाइनमा खराब प्रदर्शन गरेपछि उपाधिबाट विमुख हुनु पर्यो । सूर्यले बर्डिजका साथ १० औँ होलको समाप्तीमा शिवराममाथि ३ स्ट्रोककोअ अग्रता लिएका थिए । तर १५औँ र १७औँ होलमा ट्रिपल बोगी खेप्नु परेपछि सूर्यका लागि उपाधि यात्रा कठिन बनेको थियो । सूर्य र सञ्जयले समान १ लाख १२ हजार रुपैयाँ प्राप्त गरे ।

शिवरामले फ्रन्ट नाइनमा ५ ओभर ४१ को खराब प्रर्दर्शन गरेपनि ब्याक नाइनमा सुधार गर्दै १ अन्डर ३५ को कार्ड बनाए । टि सट प्रहार जंगलमा पुगेपनि पारबाट दिनको सुरुआत गरेका शिवरामले तेस्रो होलमा बोगीको सामना गरे । चौथो होलमा पनि उनले दुई सट खेर फाले । आठौँ होलमा पनि उनले डबल बोगीको खेपेपछि सूर्यले अग्रता बनाएका थिए । ब्याक नाइनको ११औँ र १२औँ होलमा बर्डिज गरेपनि १५औँ होलमा फेरी शिवरामले बोगीको सामना गरे ।

सूर्यले भने तेस्रो,छैठौँ र सातौँ होलमा बर्डिज गर्नु अघि पहिलो होलमा बोगी खेप्दै खेलको सुरुआत गरेका थिए । ब्याक नाइनको १०औँ र ११औँ होलमा बर्डिज गर्न सफल सूर्यले १५औँ र १७औँ होलमा ट्रिपल बोगी प्रहार गरे । सन्जयले फ्रन्ट नाइनमै १ अन्डर ३५ स्कोर गरेपनि ब्याक नाइनमा खराब प्रदर्शन गरे ।

आर्मीका प्रो.धन बहादुर थापा(७७)ले कुल दुई अन्डर २ सय ८६ स्कोरका चौथो र गोकर्णका भुवन नगरकोटी(७३) कुल २ सय ८७ स्कोरका साथ पाँचौँ स्थान रहे । धनबहादुरले ७४ हजार र भुवनले ६५ हजार रुपैयाँ पाए ।

२ ओभर २ सय ९० को कार्ड बनाउँदै शिवरामका दाजु जयराम श्रेष्ठ छैटौं भएर उनले ६० हजार रुपैयाँ जिते । २ सय ९२ कार्ड बनाउँदै सातौँ स्थान प्राप्त गरेका राजेन्द्र थापा मगरले ५५ हजार रुपैयाँ प्राप्त गरे । रवि खड्का र तीर्थ पौडेल समान २ सय ९३ प्रदर्शनका साथ संयुक्त रुपमा आठौंमा रहे । रामे मगर र बलभद्र राईले पनि २ सय ९४ स्कोर बनाएपछि दसौं स्थानमा रहे ।

धरानका शुक्र राई(७७)ले ५ ओभर २ सय ९३ स्कोरको प्रदर्शन गर्दै एमेच्योर तर्फको उपाधि जिते । टंक बहादुर कार्की (७७)ले २ सय ९९ को कार्ड बनाउँदै दोस्रो भए । प्रतियोगिताका विजेतालाई सूर्य नेपाल प्रा.लीका प्रबन्ध निर्देशक अभिमन्यु पोदार र नेपाल गल्फ संघका अध्यक्ष टासी घलले पुरस्कृत गरे ।

७२ होलमा खेलिएको सूर्य नेपाल गल्फ टुर २०१६–०१७ को अन्तिम इभेन्टमा ३६ प्रोफेशनल गल्फर र १२ एमेच्योर गरी कुल ४८ गल्फरको सहभागिता थियो ।