सिलोङ, माघ २७ । भारतमा जारी १२औं दक्षिण एसियाली खेलकुद (साग) को छैटौं दिन उसुमा दुई रजत थपिएको छ ।
नेपालका लागि हरिप्रसाद गोले र सविता राईले उसु अन्तर्गत थाउलो स्पर्धामा रजत जितेका हुन् । मंगलबार ९.०१ अंक प्राप्त गरेका गोलेले बुधबार समान ९.०१ अंक नै प्राप्त गर्दै कुल १८.०२ अंकसहित रजत पदक जितेका हुन् । सो स्पर्धामा भारतका एम ग्यानदास सिंहले कुल १८.७९ अंकसहित स्वर्ण जिते ।
यस्तै खोटाङकी सविता राईले उसुमा नेपाललाई रजत पदक दिलाइन् । राईले १७.७० अंकसहित रजत जितिन् । सोही स्पर्धामा भारतकी सरातम्बप् छानुले १८.६२ अंकसहित स्वर्ण तथा पाकिस्तानकी कोमल इमान्युयलले कास्य जितिन् ।
