काठमाडौं, फागुन २४
मदन–पासाङ स्मृति प्रथम राष्ट्रिय महिला भलिबल प्रतियोगिताको सेमिफाइनल समिकरण पुरा भएको छ । सोमवार भएको लिग चरणको दुवै खेलमा सफलता हात पादै न्यू–डायमण्ड एकेडेमी र एपीएफ क्लब विजेताको रुपमा अन्तिम चारमा स्थान बनाएका छन् । यसै गरि १ खेल जित १ खेलमा हार बेहोरेका पश्चिमाञ्चल र पुलिस पनि उपबिजेताको रुपमा सेमिफाइनलमा प्रवेश गरेका हुन् ।
मंगलबार हुने सेमिफाइनलकोपलिो खेलमा न्यू डायमण्ड र पुलिस तथा दोस्रो खेलमा एपीएफ र पश्चिमाञ्चल फाइनल प्रवेशका लागि खेल्नेछ । मदन भण्डारी स्पोर्टस एकेडेमीको आयोजनामा सञ्चालन भएको प्रतियोगितामा न्युडायमण्डले आफ्नो पहिलो खेलमा सेन्ट डेभिज स्कुललाई २५–५,२५–५र २५–६ को सोझो सेट तथा दोश्रो खेलमा पश्चिमाञ्चललाई ३–१ ले हरायो । पहिलो सेट २३–२५ ले गुमाएको न्युडायमण्डले लगातार तीन सेट २५–२२, २५–२१ र २५–२० ले जितेको थियो । त्यस्तै पश्चिमाञ्चलले पहिलो खेलमा सेन्ट डेभिज स्कुललाई २५–११, २५–७ र २५–११ को सेटमा हराएको थियो ।
नैकाप स्थित न्युडायमण्ड स्कुलको कोर्टमा भएको समूह बीको खेलमा एपीएफले न्यू डायमण्ड बीलाई २५–१, २५–३ र २५–६ को सोझो सेटमा हरायो । दोश्रो खेलमा नेपाल पुलिस क्लबलाई २५–१४, २५–२० र २५–१५ को सोझो सेटमा हरायो । पुलिसले आफ्नो पहिलो खेलमा न्य्ू डायमण्डको बीलाई २५–६, २५–७ र २५–७ को सोझो सेटमा हराएको थियो । प्रतियोगिताको विजेताले ५० हजार रुपैयाँ सहित मेडल, ट्रफी, दोस्रोले ३५ हजार, तेस्रोले २५ हजार र चौथोले १० हजार पुरस्कार पाउने आयोजकले जनाएको छ ।
