काठमाडौं (हाम्रो खेलकुद) – पर्यटकीय नगरी पोखरामा कार्तिक दोस्रो साताबाट आयोजना हुन लागेको पोखरा प्रिमियर लिग (पीपीएल) टी–ट्वान्टी क्रिकेटले बैंकिङ पार्टनरको रुपमा नबिल बैंक पाएको छ ।

तस्बिर सौजन्य : क्रिकेटिङनेपाल

पीपीएल आयोजक क्वीन्स इभेन्ट म्यानेजमेन्ट र नबिल बैंकले आइतबार बैंकिङ पार्टनरको लागि सम्झौतामा हस्ताक्षर गरेको छ । सम्झौतामा बैंकका प्रमुख कार्यकारी अधिकृत (सिइओ) अनिल केसरी शाह र पीपीएल आयोजक क्वीन्स इभेन्ट म्यानेजमेन्ट प्रालिका प्रवन्ध निर्देशक छुम्बी लामाले हस्ताक्षर गर्दै सम्झौता पत्र आदान प्रदान गरे । सम्झौता अनुसार नबिल बैंक बैंकिङ पार्टनरको रुपमा रहने छ । तर, सम्झौताको रकम भने खुलाइएको छैन ।

सम्झौता पछि बैंकका सिइओ अनिल केसरी शाहले लामो समयपछि खेलकुदमा फर्किएको बताउदै अब बैंक खेलकुदमा लागि रहने बताए । उनले खेलकुदमा प्रायोजक गर्ने पहिलो बैंकको नबिल बैंक रहेको स्मरण गर्दै लामो समयपछि यसपटकबाट फेरि खेलकुदमा होमिएको बताए । ‘हामीले फेरि शुरुवात गरेका छौं । यो शुरुवात मात्रै हो भविष्यमा क्रिकेटसँगै अन्य खेललाई पनि सहयोग गर्दै जाने हाम्रो लक्ष्य छ,’ सिइओ अनिलले पत्रकार सम्मेलनमा भने, ‘फुटबलबाट शुरु गरेका थियौं, अब हामी क्रिकेटमा मोडिएका छौं । पछिल्लो समय क्रिकेटले छलाङ मारेको छ । त्यसैले हामी पीपीएलसँग आबद्ध भएका हौं ।’

नबिल बैंकले यसअघि ‘ए’ डिभिजन क्लब थ्री स्टार क्लबलाई मुख्य प्रायोजन गरेको थियो । जुन नेपाली खेलकुदमा भित्रिएको पहिलो कर्पाेरेट व्यवसायिक सम्झौता थियो । त्यसयता विभिन्न कर्पाेरेट हाउसहरुले क्लब तथा विभिन्न प्रतियोगितालाई प्रायोजन गर्ने प्रचलनको थालनी भएको थियो ।

यता, क्वीन्स इभेन्टका प्रवन्ध निर्देशक छुम्बी लामाले कर्पाेरेट हाउसहरुको सहभागिता विना केही कार्य गर्न पनि सम्भव नरहेको बताउदै नबिल बैंकलाई बैंकिङ पार्टनर बनेको मा धन्यवाद ज्ञापन गरे ।

यस्तै नेपाली क्रिकेट टिमका कप्तान पारस खड्काले कर्पाेरेट क्षेत्रको सहयोगले नै नेपाली क्रिकेटलाई राम्रो हुदै जाने बताए । उनले पछिल्लो पाँच वर्षयता पोखरमा छुट्टै खालको माहोल बनेको बताए ।
सम्झौता कार्यक्रममा नेपाली राष्ट्रिय क्रिकेट टोलीका कप्तान पारस खड्का, उपकप्तान ज्ञानेन्द्र मल्ल र पुर्व मिस नेपाल तथा नबिल बैंका भिसा गर्ल सृष्टि श्रेष्ठको पनि उपस्थिति रहेको थियो ।

पीपीएल कार्तिक ९ गतेबाट २० गतेसम्म पोखरामा आयोजना हुदैछ । फ्रेन्चाइजको आधारमा हुने प्रतियोगिताका लागि सहभागी सबै ६ क्लबले अक्सनबाट खेलाडी अनुबन्ध गरिसकेको छ । विदेशी खेलाडी अनुबन्ध गर्ने प्रयास थालिरहेको छ ।