काठमाडौं (हाम्रो खेलकुद) – साविकको विजेता न्यु डायमन्ड एकेडेमी र विभागीय नेपाल एपिएफ क्लबले रजधानीमा आजबाट सुरु भएको दोस्रो संस्करणको होङवान्जी न्यु डायमण्ड कप खुला राष्ट्रिय महिला भलिबल प्रतियोगितामा विजयी सुरुवात गरेका छन् ।

नैकापस्थित न्यु डायमन्ड एकेडेमीको भलिबल कोर्टमा बुधबार भएको उद्घाटन खेलमा साविकको विजेतासमेत रहेको आयोजक न्यु डायमन्डले चितवन टाइग्रेसमाथि ३–० को सोझो सेटमा जित निकालेको हो । पहिलो सेटमा न्यु डायमन्डले २५–१३ को सहज जित निकालेको थियो ।

दोस्रो सेटमा भने न्यु डायमन्डले आफैले गल्ती गरेपनि २५–१८ ले जित्न सफल भएको थियो । तेस्रो सेटमा दोस्रो रोजाईको खेलाडी उतारेपनि न्यु डायमन्डले २५–११ ले सहजै जित्न सफल भयो । यससँगै न्यु डायमन्ड समूह ‘ए’ को विजेताको रुपमा क्वाटरफाइनलमा प्रवेश गर्दा पराजित भएर पनि चितवनले समूह उपविजेताको रुपमा अन्तिम आठमा पुग्न सफल भयो । अब न्यु डायमन्डले क्वाटरफाइनलमा समूह ‘सी’ को उपविजेता आर्मीसँग तथा चितवनले समूह ‘सी’ को विजेता नेपाल पुलिस क्लबसँग खेल्नेछ ।

यसअघि बुधबार भएको पहिलो खेलमा साविकको उपविजेता नेपाल एपिएफ क्लबले जावलाखेल भलिबल प्रशिक्षण केन्द्रमाथि ३–० को सहज जित निकाल्यो । एपिएफले २५–५, २५–१८ र २५–८ ले सहजै खेल आफ्नो पक्षमा पारेको थियो । समूह ‘डी’ बाट एपिएफ विजेता तथा जावलाखेल उपविजेताको रुपमा अघि बढ्यो ।

बुधबारै भएको विभागीय डर्वी भिडन्तमा नेपाल पुलिस क्लबले त्रिभुवन आर्मी क्लबमाथि ३–० को सहज जित निकाल्यो । प्रतिस्पर्धात्मक खेलमा पुलिसले पहिलो र दोस्रो सेटमा समान २५–२१ र २५–२१ को सहज जित निकालेको थियो । तेस्रो सेट भने पुलिसले २५–१८ ले सहजै आफ्ना पक्षमा पार्न सफल भयो । अर्काे खेलमा पोखराको टप्स माविले पारामाउन्ट स्कुलमाथि २५–१४, २५–१२ र २५–१० ले आफ्नो पक्षमा पार्न सफल भयो ।

अब क्वाटरफाइनलमा समुह ‘डी’ को विजेता बनेको एपिएफले समूह ‘बी’ को उपविजेता पारामान्टसँग खेल्नेछ । यस्तै समूह ‘बी’ को विजेता टप्सले जावलाखेलसँग खेल्नेछ । क्वाटरफाइनल खेल बिहिबार हुनेछ ।

पहिलो क्वाटरफाइनलमा चितवन र नेपाल पुलिस क्लब, दोस्रो खेलमा पारामाउन्टले नेपाल एपिएफ क्लब, न्यु डायमन्डले त्रिभुवन आर्मी क्लब र टप्सले जावलाखेलसँग खेल्नेछ ।

प्रतियोगिताको बिजेताले ३ लाख र उपविजेताले २ लाख रुपैयाँ पाँउनेछन । तेस्रो हुने टिमले एक लाख १ हजार र चौथोले ५१ हजार प्राप्त गर्नेछन् । प्रतियोगिताको सर्वोकृष्ट खेलाडीले १५ हजार रुपैयाँ र ब्यक्तिगत विधाका उत्कृष्टले जनही ५÷५ हजार रुपैयाँ प्राप्त गर्नेछन् ।

प्रतियोगिताको उद्घाटन युवा तथा खेलकुद मन्त्री जगत विश्वकर्माले गरेका थिए । उद्घाटन समारोहमा संसद् कृष्णगोपाल श्रेष्ठ, मदन भन्डारी स्पोर्टस् एकेडेमीका अध्यक्ष विनोद श्रेष्ठ, नेपाल भलिबल संघका अध्यक्ष मनोरन्जनरमण शर्मा र महासचिव जितेन्द्रबहादुर चन्दलगायतको उपस्थिति रहेको थियो । प्रतियोगिता पुस २८ गतेसम्म सञ्चालन हुनेछ ।