पोखरा (हाम्रो खेलकुद) – साविकको विजेता तथा घरेलु महिला भलिबलको पावर हाउस विभागीय नेपाल एपिएफ क्लबले पोखरामा आजबाट सुरु भएको दोस्रो सभामुख कप राष्ट्रिय महिला भलिबल प्रतियोगितामा विजयी सुरुवात गरेको छ ।

पोखरा रंगशालास्थित भलिबल कोर्टमा मंगलबार भएको पहिलो खेलमा एपिएफले प्रदेश नम्वर १ माथि ३–० को सहज जित निकाल्दै प्रतियोगितामा विजयी सुरुवात गरेको हो । एपिएफले प्रदेश १ माथि २५–३, २५–८ र २५–३ को सहज जित निकाल्यो ।
एपिएफले गत संस्करणमा विभागीय नेपाल पुलिस क्लबलाई पराजित गर्दै उपाधि जितेको थियो । एपिएफ वर्षको सातौ उपाधिको खोजीमा रहनेछ । एपिएफले आदी अवााधीमा मात्रै उपाधि जित्नबाट चुकेको थियो । एपिएफले यसअघि शेरबहादुर खड्का स्मृति भलिबल, सभामुख कप भलिबल, एनभिए क्लब लिग च्याम्पियनसिप, तीज कप पोखरा र एनभीए महिला भलिबलको उपाधि जितेको थियो । एपिएफले एक साताअघि मात्रै न्यु डायमन्ड कपको उपाधि जित्दै उापधि सङ्ख्या ६ बनाएको थियो ।
मंगलबारै भएको दोस्रो खेलमा प्रदेश नम्वर ५ ले प्रदेश नम्वर २ माथि २५–१०, २५–१४ र २५–८ ले पराजित गर्दै विजयी सुरुवात गरेको छ ।
प्रतियोगिता अन्तरगत आजै लिग चरणको दुई खेल हुदैछ । अहिले प्रदेश नम्वर ३ र त्रिभुवन आर्मी क्लबले प्रतिस्पर्धा गरिरहेको छ । उद्घाटन खेलमा आयोजक गण्डकी प्रदेश र विभागीय नेपाल पुलिस क्लबबीच खेल हुनेछ ।
प्रतियोगितामा तीन विभागीय टोली र ७ प्रदेश गरी १० टोलीको सहभागिता रहेको छ । सहभागी टोलीलाई चार समूहमा विभाजन गरिएको छ ।
समूह ‘ए’ मा एपिएफ, प्रदेश १ र सुदुरपश्चिम प्रदेश रहेको छ । समूह ‘बी’ मा प्रदेश ५, प्रदेश २ र कर्णली प्रदेश रहेको छ । समूह ‘सी’ मा आर्मी र प्रदेश तीन तथा समूह ‘डी’ मा नेपाल पुलिस क्लब र गण्डकी प्रदेश रहेको छ । हरेक समूहका शीर्ष दुई टोलीले क्वाटरफाइनलमा स्थान बनाउनेछ । प्रतियोगिता माघ ५ गतेसम्म सञ्चालन हुनेछ ।
प्रतियोगिताको विजेताले ३ लाख ५० हजार रुपैया हात पार्नेछन् । उपविजेताले १ लाख ७० हजार, तेश्रोले १ लाख र चौथो हुनेले ५० हजार रुपैया हात पार्नेछन् । प्रतियोगिताको सर्वाेत्कृष्ट खेलाडीले १० हजार रुपैया हात पार्नेछ । व्यक्तिगत विधातर्फका बेष्ट स्पाईकर, बेष्ट ब्लकर, बेष्ट सर्भर, बेष्ट सेटर, बेष्ट लिवेरो र वेष्ट प्रशिक्षकले जनही ५–५ हजार रुपैया हात पार्नेछन् ।