काठमाडौं (हाम्रो खेलकुद) – महिला भलिबलमा दर्शकको पहिलो रोजाईको चर्चित टोली न्यु डायमन्ड एकेडेमीले ढोरपाटन महिला डबल लिग भलिबल नखेल्ने निर्णय गरेको छ ।
एकेडेमीका प्रिन्सिपल तथा प्रशिक्षक कुमार राईले न्यु डायमन्ड एकेडेमीले विद्यार्थीको अध्ययनलाई मध्यनजर गर्दै ढोरपाटन महिला डबल लिग भलिबल नखेल्ने निर्णय गरेको हाम्रो खेलकुदलाई जानकारी गराए । ‘ढोरपाटन लिग नखेल्नुमा व्यक्तिगत कुनै रिसिवी छैन । हामीले विद्यार्थीको अध्ययनलाई मध्यनजर राख्दै लामो समयसम्म चल्ने ढोरपाटन लिग नखेल्ने निर्णय गरेका हौं,’ प्रशिक्षक राईले हाम्रो खेलकुदलाई भने, ‘मेरो सेट टिमको ३ विद्यार्थी एसईईं परीक्षाको तयारीमा छ । उनीहरुको पढाईलाई हामी बिथोल्न चहादैनौ । भलिबलमा ढोरपाटन लिग मात्रै हैन । हामीले अन्य धेरै प्रतियोगिता पनि खेल्नुछ । ढोरपाटनमा १५ दिन, अन्य प्रतियोगिता कम्तीमा एक साताको हुने गर्दछ । यसले विद्यार्थीको अध्ययनमा बाधा आउने देखियो । हामीले आयोजकलाई दुई वर्ष अघि देखि नै प्रतियोगिताको अवधि घटाउन बराम्बार आग्रह गर्दा पनि उहाँहरुले हाम्रो कुरालाई सुनुवाई गर्नुभएन । त्यसैले हामीले प्रतियोगिता नै नखेल्ने निर्णय गरेका हौं ।
यस्तै प्रशिक्षक राईले आगमी दिनमा पनि प्रतियोगिताको अवधि नघटाए ढोरपाटन भलिबलमा सहभागिता नै नजनाउने बताए ।
‘५ दिन पहिलो लिग र ५ दिन दोस्रो लिग गराउन आग्रह गरेका थियो । अर्काे विकल्पमा चौथो हुनेसम्मको टोलीलाई पहिलो लेग नखेलाउने र पहिलो लेगबाट शीर्ष ३ टोली छनोट गरी ७ टोलीबीच दोस्रो लिग खेलाउनको लागि पनि आग्रह गरेका थियौं र तर, हाम्रो कुरा उनीहरुले सुन्दै सुनेन । प्रशिक्षक राईले भने ।
ढोरपाटन डबल लिग भलिबल माघ ५ गतेबाट १९ गतेसम्म हुदैछ । न्यु डायमन्ड दोस्रो देखि १३औं संस्करणसम्मको लगातार सहभागी टोली हो । ढोरपाटनको उपाधि जित्न नसकेको न्यु डायमन्डले दर्शकको मन जित्न सफल टोली हो ।
आयोजक ढोरपाटनले बिहीबार मात्रै पत्रकार सम्मेलनको आयोजना गर्दै प्रतियोगिताको सम्पूर्ण तयारी पुरा भएको जानकारी गराएको थियो । ढोरपाटन क्लबका अध्यक्ष मनवीर छन्त्यालले न्यु डायमण्डले प्रतियोगिता खेल्न आउनेमा विश्वस्त रहेको बताएका थिए ।
