काठमाडौं (हाम्रो खेलकुद) – नैकापको न्यु डायमन्ड एकेडेमीलाई होङ्गगान्जी बौद्ध समाजले मुख्य प्रायोजन गरेको छ ।न्यु डायमन्डले बुधबार होङ्गगान्जी बौद्ध समाजसँग एक वर्षको लागि मुख्य प्रायोजन सम्झौता गरेको हो ।

सम्भवत नेपालको क्लब भलिबलको इतिहासमा यो नै सबैभन्दा ठुलो प्रायोजन हो । भलिबलको सम्झौतामा न्यु डायमन्ड स्पोर्टस् क्लबकी अध्यक्ष सुनकेशरी माली र होङ्गगान्जीका कन्ट्री म्यानजेर सोनाम वाङ्दी भुटियाले हस्ताक्षर गर्दै सम्झौता आदान प्रदान गरे ।

सम्झौतापछि होङ्गगान्जीले न्यु डायमन्डले आयोजना गर्ने तेस्रो संस्करणको ‘होङ्गगान्जी न्यु डायमन्ड कप’ खुल्ला राष्ट्रिय महिला भलिबल प्रतियोगिताको पहिलो र दोस्रो पुरस्कारको ७ लख २ हजार रुपैया उपलब्ध गराउनेछ । यसका साथै खेल पोशाकका लागि आजकै मितिबाट लागु हुनेगरी ३ लाख रुपैया र अन्य विविधको ५ लाख रुपैया आवश्यकता अनुसार उपलब्ध गराउनेछ ।

तेस्रो संस्करणको होङ्गगान्जी न्यु डायमन्ड कप अर्काे वर्षको पुस अन्तिम साता हुनेछ । सम्झौतापछि न्यु डायमन्डले आफुले खेल्ने प्रतियोगिताहरुमा होङ्गवान्जी न्यु डायमन्ड’ को नामबाट खेल्नेछ । सम्झौतापछि होङ्गगान्जीका कन्ट्री डाइरेक्टर सोनाम वाङ्दी भुटियाले एक समर्थकको रुपमा न्यु डायमन्डको खेल हेन पुगेको र न्यु डायमन्डको खेल मन परेकै कारण प्रायोजना गर्न पुगेको बताए । उनले न्यु डायमन्डसँग जोडिन पाउनु खुशीको कुरा रहेको र निरन्तर न्यु डायमन्डसँगै जोडिरहन पाउनेमा आशावादी रहेको बताए ।

न्यु डायमन्डकी अध्यक्ष सुनकेशरी मालीले होङ्गगान्जी न्यु डायम्नडसँग जोडिन क्लबको लागि गौरवको विषय रहेको बताए ।
न्यु डायमन्डले यसअघि शिवम् सिमेन्टको मुख्य प्रायोजनमा पहिलो संस्करण तथा होङ्गगान्जीको मुख्य प्रायोजनमा दोस्रो संस्करण आयोजना गरिसकेको छ । पहिलो संस्करणमा न्यु डायमन्ड र दोस्रो संस्करणमा नेपाल एपीएफ च्याम्पियन बन्न सफल भएको थियो ।

पुरस्कार राशिमा बृद्धि

प्रतियोगिता संयोजक तथा न्यु डायमन्डका प्रशिक्षक तथा प्रिन्सिपल कुमार राईले अर्काे वर्ष हुने तेस्रो संस्करणको प्रतियोगिताको पुरस्कार राशिमा वृद्धि गरिएको जानकारी गराए । जसअनुसर प्रतियोगिताको विजेताले नगद ४ लाख १ हजार रुपैयासहित सिल्ड, मेडल र प्रमाणपत्र प्राप्त गर्नेछन् । उपविजेताले ३ लाख १ हजार रुपैयासहित सिल्ड, मेडल र प्रमाणपत्र प्राप्त गर्नेछन् । तेस्रो हुनेले २ लाख १ हजारसहित सिल्ड, मेडल र प्रमाणपत्र प्राप्त गर्नेछन् ।चौथो हुनेले १ ला १हजार रुपैयासहित प्रमाणपत्र मात्र प्राप्त गर्नेछ ।

यो नै नेपालको सर्वाधिक धनराशिको पहिलो प्रतियोगिता बन्नेछ । यसअघि सभामुख कप महिला भलिबलको विजेताले ३ लाख ५० हजार रुपैया हात पारेको थियो ।
यस्तै प्रतियोगिताको सर्वाेत्कृष्ट खेलाडीले २५ हजार रुपैया प्राप्त गर्नेछ । व्यक्तिगत विधातर्फ स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही ७–७ हजार रुपैयासहित ट्रफी र प्रमाणपत्र प्राप्त गर्नेछ ।