काठमाडौं (हाम्रो खेलकुद) – रामेछाप जिल्ला खेलकुद बिकास समितिको आयोजनामा विगत तीन वर्ष निरन्तर आयोजना हुदै आएको रामेछाप सिभिल राष्ट्रिय पुरूष भलिबल च्याम्पियनसिपको चौथो संस्करण आउदो मंगलबारबाट हुने भएको छ ।
आयोजकले शुक्रबार राजधानीमा पत्रकार सम्मेलनको आयोजना गर्दै प्रतियोगिता माघ २२ देखि २६ गतेसम्म रामेछाप सदरमुकाम मन्थली हुने जानकारी गराएको हो । प्रतियोगितामा प्रदेशका ७ टोली विभिन्न ५ क्लब गरी १२ टोलीले सहभागिता जनाउनेछ ।
यस प्रतियोगितामा विभागीय टोलीले सहभागिता जनाउन नपाउने भएपनि विभागमा आबद्ध खेलाडीलाई एक टिमले ३ जनासम्म खेलाउन पाउने प्रावधान राखिएको रामेशछाप जिल्ला खेलकुद बिकास समितिका अध्यक्ष पुरूषोत्तम कडरियाले जानकारी गराए । यस्तै टिमले पनि ३ विदेशी खेलाडी राख्न पाउने प्रावधान छ ।
अध्यक्ष कडरियाले विभागीय टोलीले नेपाली खेलकुदको बिकासमा अतुलनीय योगदान दिएको बताउदै सधै विभाग च्याम्पियन बनेको भन्दा पनि सिभिल टोलीलाई च्याम्पियन बनाउने योजना रहेको बताए । विभागका खेलाडीहरुमध्ये पोखरामा भएको चौथो आरबीबी एनभीए क्लब लिग च्याम्पियनसिपको प्लेइङ सेटमा रहेका तीन खेलाडी राख्न पाउने प्रावधान छ ।
सहभागी टोलीलाई दुई समूहमा विभाजन गरिनेछ । लिग कम नकआउटका आधारमा हुने प्रतियोगिताको विजेताले ३ लाख रूपैया हात पार्नेछ । यस्तै दोस्रो हुनेले २ लाख रूपैया, तेस्रो हुनेले १ लाख रूपैया र चौथो हुने टिमले ५० हजार रूपैया हात पार्नेछ । प्रतियोगिताको सर्वाेत्कृष्ट खेलाडीले १५ हजार रूपैया हात पार्नेछन् । व्यक्तिगत विधातर्फ सर्भर, स्पाइकर, ब्लकर, लिवेरो, सेटर र प्रशिक्षकले जनही १०–१० हजार रूपैया हात पार्नेछन् ।
प्रतियोगिताको अनुमानित लागत रकम ४८ लाख ५८ हजार रूपैया रहने आयोजकले अनुमान गरेको छ । प्रतियोगितालाई मन्थली नगरपालिका मुख्य सह–आयोजक र मुख्य प्रायोजक रहेको छ । रामेछापका अरु १ नगरपालिका र ६ गाँउपालिका सह–आयोजक रहेको छ ।
