काठमाडौं (हाम्रो खेलकुद) – गण्डकी प्रदेशले चौथो रामेछाप मेयर कप सिभिल च्याम्पियनसिपको उपाधि हात पारेको छ । रामेछापको सदरमुकाम मन्थली बजारमा आइतबार भएको फाइनल खेलमा गण्डकीले नमुनादीप युवा क्लबलाई ३–० को सोझो सेटमा पराजित गर्दै उपाधि जित्न सफल भएको हो ।

शनिबारै फाइनल हुने भनिएपनि वर्षाका कारण खेल आइतबारको लागि सारिएको थियो । गण्डकीले नमुनादिप युवा क्लबलाई २५–२२, २५–२१ र २५–१८ ले पराजित गर्यो । च्याम्पियन बनेसँगै गण्डकीले ३ लाख रुपैयाँ र उपविजेता नमुनदीपले २ लाख रुपैयाँ हात पारे ।

आइतबार नै भएको तेस्रो स्थानको खेलमा शान्तीदिप युवा क्लबले प्रदेश १ लाई २५–२३, २०–२५, २५–१५, २३–२५, १६–१४, ले पराजित गर्यो । तेश्रो भएको शान्तिदीप युथ क्लबले १ लाख रुपैयाँ पायो ।

प्रतियोगितामा गण्डकी प्रदेशका कप्तान हरि पाण्डे उत्कृष्ट खेलाडी घोषित भए । पाण्डेले १५ हजार रुपैयाँ प्राप्त अग्रे । नमुनादिपका कुल बहादुर थापा उत्कृष्ट स्पाइकर तथा शान्तीदीपका प्रताप खवास उत्कृष्ट सर्भर भए । अन्य चार ब्यक्तिगत विधाका पुरस्कार गण्डकी प्रदेशनको नाममा रह्यो । राजकुमार गुरुङ उत्कृष्ट प्रशिक्षक, राजन दर्लामी उत्कृष्ट लिबरो, सुजन चोखाल उत्कृष्ट सेटर र बलीराम चौधरी उत्कृष्ट ब्लकर भए । व्यक्तिगत विधातर्फका विजेताले जनही १०–१० हजार रुपैयाँ हात पारे ।

विजयी टोली तथा खेलाडीहरुलाई प्रमुख अतिथि तीन नम्बर प्रदेशका आर्थिक मामिला तथा योजना मन्त्री कैलाशप्रसाद ढुंगेल र मन्थली नगरपालिकाका प्रमुख रमेस बस्नेत लगायत अतिथीले पुरस्कार प्रदान गरे । रामेछाप जिल्ला खेलकुद विकास समितीको आयोजनामा सञ्चालित प्रतियोगिता २२ माघ बाट सुरु भएको थियो ।

कुल ७ लाख २५ हजार पुररस्कार राशी रहेको प्रतियोगितामा ६ प्रादेशिक टोलीसहित रामेछापका तीन सहित १० टोलीको सहभागिता रहेको छ । प्रतियोगितालाई मन्थली नगरपालिका मुख्य सह–आयोजक र मुख्य प्रायोजक रहेको छ । रामेछापका अरु १ नगरपालिका र ६ गाँउपालिका सह–आयोजकको रुपमा रहेको थियो । गत संस्करणमा सुदुरपश्चिमको टोलीले उपाधि जितेको थियो भने शान्तीदिप युवा क्लब उपविजयी भएको थियो ।