काठमाडौं (हाम्रो खेलकुद) – सन् २०१४ मा दक्षिण कोरियाको इन्चोनमा भएको १७ औं एसियाली खेलकुदमा नेपालको लागि एकमात्र पदक विजेता विमला तामाङले गैरआवसिय नेपाली संघ (एनआरएनए) बाट आठौं राष्ट्रिय खेलकुदमा प्रतिस्पर्धा गर्ने भएकी छिन् ।

नेपालगंजमा यसै महिनाको अन्तिम साताबाट सुरु हुन प्रस्ताव गरिएको आठौं राष्ट्रिय खेलकुदको लागि एनआरएनले २४ खेलाडीसहित टोलीको घोषणा गरेको छ । आठौंमा समावेश विभिन्न ३५ खेलमध्ये एनआरएनएले व्यक्तिगत विधाका ९ खेलमा सहभागिता जनाउदै छ । आठौंमा सहभागिता जनाउने खेलाडीहरुमा अमेरिका, अष्ट्रेलिया, मलेसिया, युएई, मकाउ, जापान र हङकङगरी सात मुलुकबाट कराते, तेक्वान्दो, जुडो, ब्याडमिन्टन, लन टेनिस, टेवल टेनिस, गल्फ, म्याराथन र बक्सिङ गरी कुल २४ जना खेलाडीले सहभागिता जनाउने भएका छन् । टिमको नेतृत्व मुकेश वरुवालले गर्नेछन् ।

कराँतेको कुमुते पुरुषतर्फ विजय तामाङ (५० केजीमुनि), लक्ष्मण मगर (५५ केजीमुनि), उत्तम गुरुङ, (६० केजीमुनि), नान बहादुर थापा, (६७ केजीमुनि), जनक सिंह खड्का (७५ केजीमुनि), नोर्वु तामाङ (८४ केजीमुनि) र लोकमान सिंह खड्का ले ८४ केजीमाथि प्रतिस्पर्धा गर्नेछन् । टिम कुमुतेमा कुमार भुषाल, लोक बहादुर श्रेष्ठ, राम बहादुर तामाङ, जनक सिंह खड्का र लोकमान सिंह श्रेष्ठ रहेका छन् । कुमुते गर्ल्सतर्फ शान्तिदेवी अधिकारी र कातामा विमला तामाङले प्रतिस्पर्धा गर्नेछिन् ।

रेफ्रीमा रवि शाही, योगेन्द्र कोइराला र शान्ता थोकर रहँदा टिम प्रशिक्षकमा सुनिल लामा र पर्शुराम घिमिरे रहेका छन् । फुल कन्ट्रयाक्ट करातेमा अविरल घिमिरे ७५ केजीमा छन् । जुडोमा मोहन बम, बक्सिङमा प्रचण्ड केसी छन् ।

लन टेनिसमा अमृत पौडेल र संरक्षक बज्राचार्य रहेका छन् । डबलमा पनि यही जोडीले प्रतिस्पर्धा गर्नेछन् । गल्फमा लव कुमार गुरुङ, ब्याडमिन्टनमा बिक्की बुढा, सुर्य गिरी, हिरालाल श्रेष्ठ छन् । समूहमा सुर्य गिरी र हिरालाल रहेका छन् । एथलेटिक्समा नारी चन्द रहँदा तेक्वान्दो क्योरोगीमा नवीन श्रेष्ठ र पुष्प थापामगर रहेका छन् ।

खेलाडी छनोट एनआरएनएको ८० देशमा रहेको युवा तथा खेलकुद शाखाको छनोट समितिले राम्रो खेल्ने खेलाडीलाई छनोट गरिएको संयोजक सुदन थापाले जानकारी गराए । प्रतियोगिताको लाग्ने खर्च एनआरएनए र आइसीसी र एनसीले बेहोर्ने छ ।