प्रकाश तिमल्सिना, काठमाडौं

पूर्व सांसद राजीव विक्रम शाह दोस्रो पटक नेपाल एथलेटिक्स संघको अध्यक्षमा निर्वाचित भएपछि केहि विरोधमा देखिएका छन् भने उनी आफ्नो नयाँ कार्यकालको योजना बनाउन थालेका छन् । निर्वाचनलाई लिएर केहि विवाद चलिरहेपनि राष्ट्रिय खेलकुद परिषद् (राखेप) स्वीकृति र एथलेटिक्सको अन्तर्राष्ट्रिय प्रतिनिधिको रोहवरमा यसै साता साधारण सभा भएको थियो । त्यसैले पछिल्लो विवादले धेरै अर्थ नराख्न सक्छ ।

तर, दोस्रो कार्यकाल शाह आफ्नै लागि भने चुनौतिपूर्ण रहेको स्वयम स्वीकार्छन् । पाँच वर्षअघि पहिलो पटक संघको अध्यक्षमा निर्वाचित हुँदा उनलाई शंकाको लाभ थियो । संघ चलाउने धेरै अनुभव छैन, जाजरकोटबाट जननिर्वाचित प्रतिनिधि भएका नाताले धेरै समय दिन पाउँदिन भन्दा संघका पदाधिकारीले सहजतापूर्वक लिएका थिए । तर, अब परिस्थिति बलदिएको छ ।

लामो समय एथलेटिक्स संघले सोचे अनुरुपको काम गर्न नसकेकाले शाहको आगमनपछि केहि परिवर्तनको अपेक्षा गरिएको थियो । तर, परिणाम त्यस्तो भएन । केहि समय सामान्य ढंगमा संघ चलेपनि पछि पदाधिकारीबीच विवाद बढ्दै गयो र संघ विस्तारै आन्तरिक रुपमा कमजोर हुन थाल्यो ।

खेलाडी अविभावक विहिन भए भने पदाधिकारी वा अन्य आफुखुसी चल्ने अवस्था बन्यो । एउटा समूहले साथ दिएपनि शाहले संघलाई विवादरहित बनाउन सकेनन् । उनी विवादमा घेरिरहे, त्यसबाट बाहिर निस्कन सकेनन् । उनी भन्छन् , ‘यो अवधिमा निकै पापड पेलाई भयो । चर्को विरोधको सामना गरियो । संघ भित्र गुट उपगुट भयो । जसका कारण काम गर्न कठिन भयो ।’

चितवनको सौराहामा यसै साता भएको साधारण सभाले उनलाई पुनः अध्यक्षमा निर्विरोध निर्वाचित गरेको थियो । अब आउने चार वर्ष भने आफ्नालाई सहज नहुने र केहि गरेर देखाउने चुनौति रहेको शाह बताउँछन् । ‘पहिलो कार्यकालमा मलाई पनि धेरै अनुभव थिएन । मैले समय पनि दिन सकिन । अबको कार्यकाल पुरै एथलेटिक्समा समय दिनेछु,’ ५१ वर्षे शाहको प्रतिवद्धता छ,‘ एथलेटिक्सको विकासका लागि योजनावद्ध  ढंगले अघि बढ्ने र सबैलाई मिलाएर लिएर जाने प्रयास गर्नेछु ।’

राखेपका तत्कालिन सदस्य सचिव किशोरबहादुर सिंह एथलेटिक्स संघको अध्यक्ष रहँदा शाह त्यो समितिका वरिष्ठ उपाध्यक्ष थिए । झन्डै आठ महिनाको कार्यकालमा त्यो समितिले एथलेटिक्समा थुप्रै प्रतियोगिता आयोजना गरेको थियो । त्यति बेला नेतृत्वदायी भूमिका निर्वाह गरेकी कारण शाहलाई एथलेटिक्स परिवारले पाँच वर्षअघि अध्यक्षका रुपमा पत्याएको थियो ।

अहिले आइपुग्दा उनी पनि एथलेटिक्समा बलियो नेताका रुपमा उभिन सफल छन् । साधारण सभामा उनलाई चुनौति दिने अर्को कोहि निस्केन । जिल्लाको मजबुत साथ पाएकै कारण उनी दोस्रो पटक अध्यक्ष निर्वाचित हुन सफल भएका हुन् भन्ने धेरैको बुझाई छ । यद्दपी संघको निर्वाचन प्रक्रियालाई लिएर टिका टिप्पणी हुन छाडिसकेको छैन ।

अध्यक्ष शाहले आउने दिनमा खेलाडीको प्रशिक्षक, प्रतियोगिता, प्रशिक्षकलाई पुनर्ताजगी तालिम र चुस्त व्यवस्थापनमा ध्यान दिने योजना बनाएका छन् । ‘अब हामी क्यालेन्डर बनाएर त्यहि अनुरुप प्रतियोगिताहरु गर्नेछौं । एथलेटिक्सका सबै प्रतियोगितालाई व्यवस्थित र संघको स्वीकृति लिन अनिवार्य गर्नेछौं,’ उनले भने,‘ खेलाडी, प्रशिक्षक र अरुको सहजताका लागि अफिसको राम्रो व्यवस्थापन गर्नेछौं । अल्पकालिन र दीर्घकालिन योजनाका साथ अघि बढ्ने हाम्रो प्रयास हुनेछ ।’

शाहले एथलेटिक्सका सरोकारवाला सबैलाई अनावश्यक राजनीतिमा नलाग्न आग्रह गर्दै एथलेटिक्स विकासमा साथ दिन खोजे समेटेर लाने विश्वास दिलाएका छन् । ‘कुनै पनि संघ एक्लै चल्दैन । हरेक मान्छेसँग अलग खालको क्षमता हुन्छ । सबैलाई कार्यसमितिमा समेट्न पनि सकिन्न,’ उनले थपे,‘ तर हामी विभिन्न समिति गठन गर्छौ । त्यसमा काम गर्न इच्छुक र क्षमता भएका लागि हामी समेट्नेछौं । विवादले विकास होइन विनाश तिर धकेल्छ । त्यसले कसैलाई फाइदा गर्दैन । ’

विगतमा पनि भारतको एथलेटिक्स संघको सहयोगमा खेलाडी प्रशिक्षणको व्यवस्था मिलाएको स्मरण गर्दै शाहले आउने दिनमा पनि त्यो सहयोग लिन प्रयास गर्ने बताए । ‘हाम्रो लागि सहयोग लिन भारत सबैभन्दा सहज हुन्छ । विगतको अनुभवले पनि त्यहि भन्छ । खेलाडीहरुलाई भाषा, रहनसहन, खानपानले पनि धेरै फरक पार्दैन,’ उनले भने,‘ भारतमा प्रशिक्षण लिएका खेलाडीले अन्तर्राष्ट्रिय प्रतियोगितामा राम्रो गरेका छन् । हामीसँग सबै खाले भौतिक पूर्वाधार छैन । त्यसले खेलाडीको प्रशिक्षणका लागि भारतलगायतका अन्य देशको सहयोग लिन पहल गर्नेछौं ।’

अध्यक्ष शाहले ७ प्रदेशमा वर्षमा कुनै न कुनै एथलेटिक्स प्रतियोगिता आयोजना गर्ने लक्ष्य आफुले लिएको पनि बताएका छन् । ‘कुनै पनि खेलको विकासका लागि तल्लो तहबाट पहल हुनुपर्दछ । हामी पनि प्रदेशलाई क्रियाशील बनाउनेछौं,’ उनले थपे,‘ हरेक प्रदेशमा एथलेटिक्सको कुनै न कुनै प्रतियोगिता गर्ने गरि काम गर्नेछौं । ’

नेपालको खेलकुद विकासका लागि सबैभन्दा बढी चुनौति आर्थिक कारणले हुने शाहको बुझाई छ । ‘राखेपले दिने सहयोग र अन्तर्राष्ट्रिय निकायबाट प्राप्त हुने सहयोग रकम निकै कम छ । त्यसले खेल विकासका लागि पर्याप्त हुँदैन, उनले भने,‘ आउने दिनमा हामी संघको आर्थिक श्रोत बढाउनका कर्पोरेट हाउसहरुसँग सहकार्य गर्नेछौं । एथलेटिक्समा लगानी गर्ने वातावरण बनाउनेछौं । हामीले खेलाडीको विमाको योजना पनि सुरु गर्ने लक्ष्य राखेका छौं ।’

शाहले दोस्रो कार्यकाललाई नमुना योग्य बनाउने गरि काम गर्ने दृढता व्यक्त गरेका छन् । ‘अबको कार्यकाललाई नमुना योग्य बनाउने गरि काम गर्नेछु,’ उनले भने,‘ मेरो लागि दोस्रो कार्यकाल अवसर र चुनौति दुवै हो । म यसमा खरो उत्रने प्रयास गर्नेछु । मलाई विश्वास गर्नुहोस् केहि वर्षमा नेपालको एथलेटिक्समा देखिने गरि परिवर्तन हुनेछ । ’