नेपालगन्ज (हाम्रो खेलकुद) – आठौं राष्ट्रिय खेलकुद अन्तर्गत भलिबलमा विभागीय त्रिभुवन आर्मी क्लब र गण्डकी प्रदेशले दोहोरो सफलता हात पारेका छन् ।
बुधबारदेखि सुरु भएको भलिबलमा आर्मी र गण्डकीले पुरुष र महिलामा दोहोरो जित हात पारेको हो । यस्तै नेपाल पुलिस क्लबले पनि दोहोरो सफलता हात पार्यो । बाँकेको खजुरामा भएको पुरुषतर्फको खेलमा आर्मीले प्रदेश २ माथि ३–० को सहज जित निकाल्यो । एकोहोरो बनेको खेलमा आर्मीे प्रदेश २ लाई २५–१५, २५–९ र २५–९ ले सहजै पाखा लगायो । महिलामा आर्मीले प्रदेश ५ लाई २५–७, २५–९ र २५–१० ले हरायो ।
पुरुषतर्फ गण्डकीले प्रदेश ३ लाई ३–० को सोझो सेटमा पराजित गर्दा महिलामा पनि गण्डकीले प्रदेश २ लाई ३–० कै सोझो सेटमा हरायो ।
पुरुषमा प्रतिस्पर्धात्मक बनेको पहिलो सेट गण्डकीले ३०–२८ ले आफ्नो पक्षमा पारेपनि दोस्रो र तेस्रो सेट क्रमशः २५–१२ र २५–१८ ले जित्न सफल भयो । महिलामा गण्डकीले प्रदेश २ लाई २५–६, २५–७ र २५–९ ले हरायो ।
पुरुषतर्फ अर्काे खेलमा नेपाल एपीएफ क्लबले प्रदेश १ लाई २५–१५, २७–२५ र २५–१५ ले तथा नेपाल पुलिस क्लबले प्रदेश ५ लाई २५–१७, २५–२१ र २५–१७ ले हरायो । महिलातर्फ नेपाल पुलिस क्लबले प्रदेश १ माथि २५–१३, २५–११ र २५–११ को सहज जित निकाल्यो । महिलामा प्रदेश ५ ले प्रदेश ७ लाई २५–२२, २५–११ र २५–१९ को सहज जित निकाल्यो ।
