काठमाडौं (हाम्रो खेलकुद) – विभागीय त्रिभुवन आर्मी क्लबको महिला भलिबल टोलीकी महत्त्वपुर्ण सदस्य तथा ओपन स्पाइकर निरुता ठगुन्नाले नेपाली सेनाको जागिर छाडेका छिन् ।
निरुताले आफ्नो घरायसी समस्या र व्यक्तिगत कारणले आर्मी छाड्नुपरेको हाम्रो खेलकुदलाई जानकारी गराइन् । पछिल्लो दुई वर्षयता निरुता आर्मीको महिला भलिबल टोलीकी महत्वपुर्ण ओपन स्पाइकर बनेकी थिइन् । उनले शेरबहादुर खड्का मेमोरियल खुल्ला महिला भलिबल प्रतियोगितापछि आर्मी छाड्ने निर्णय गर्दै हेडक्वाटरमा राजिनामा पत्र बुझाइसकेको बताइन् ।
निरुताको राजीनामा स्वीकृत नभएपनि उनी १२ दिनभन्दा बढी गयल भइसकेकी छन् । ‘जागिर खाने इच्छा त थियो तर घरायसी समस्याका कारण आर्मीका जागिरे भइरहन सकिन । त्यसैले राजिनामा बुझाएको छु । जागिर खाने नखाने आफ्नो इच्छा हुन्छ । खेलाडी भएको कारण राजीनामा स्वीकृत गराउन आनाकानी गरेको हुन सक्छ । स्वीकृत हुनेमा विश्वस्त छु,’ निरुताले भनिन् ।
‘नेपालमै आयोजना हुने १३औं दक्षिण एसियाली खेलकुद (साग) को राष्ट्रिय टोलीको प्रारम्भिक २५ सदस्यीय टोलीमा परेकी छु । प्रशिक्षण असार पहिलो साताबाट हुने भन्ने सुनेकी छु प्रशिक्षणलाई आउनेछु । टोलीमा पर्न कडा मिहेनत गर्नेछु । घरेलु भुमिमा राष्ट्रिय टोलीमा रहेर खेल्ने ठुलो इच्छा छ,’ उनले थपिन् ।
आर्मी छाडेपनि तत्काल कुनैपनि टोलीबाट खेल्न मनसाय नबनाएको निरुताले बताइन् । ‘अहिले कुनैपनि टोलीबाट खेल्ने मनसाय बनाएको छैन । खेल्न पनि मिल्दैन होला । मेरो खेल्ने इच्छा पनि छैन । सायद भलिबल नै छाड्न पो सक्छु कि ?’ दार्चुलाकी २१ वर्षीय निरुताले भनिन्, ‘म आर्मीमै आएर आफ्नो खेल सुधार गरेको हु । यहाँ सम्म ल्याउन सहयोग गर्नुहुने आर्मी क्लब र सबै गुरुहरुलाई सम्झन चहान्छु । उनीहरुकै कारण म यहाँसम्म आएकी हु । खेल्ने इच्छा पलाए कोर्ट फर्कन्छु । तर, यो सम्भावना न्युन छ ।’
२०७३ को सातौं राष्ट्रिय खेलकुदमा सुदूरपश्चिमको प्रतिनिधित्व गर्दै भलिबलमा प्रवेश गरेकी उनी सोही वर्ष नै आर्मीमा करारमा आर्मीमा भर्ना भएकी थिइन् । उनलाई त्यतिबेला आर्मीका प्रशिक्षक जगदिश भट्ट र लोकेश बुढाले आर्मीमा करारमा अनुबन्ध गरेका थिए । एकवर्षे करारपछि उनी आर्मीका स्थायी जागिरे भएकी थिइन् । दुई वर्षे अवधिमा उनले आर्मीको महिला भलिबल टोलीलाई माथिल्लो स्तरसम्म ल्याएकी थिइन् ।
निरुताले पछिल्लोपटक आर्मीबाट लगनखेलमा आयोजना भएको शेरबहादुर खड्का मेमोरियल खुल्ला भलिबल प्रतियोगिता खेलेकी थिइन् । उनले उक्त प्रतियोगितामा विशेष सम्मान पनि प्राप्त गरेकी थिइन् । त्यसअघि निरुताले प्रदेश ५ मा आयोजना भएको आठौं बृहत् राष्ट्रिय खेलकुदमा आर्मीबाट खेलेकी थिइन् ।
