काठमाडौं (हाम्रो खेलकुद) – नेपाली राष्ट्रिय पुरुष भलिबल टिमले साउन अन्तिम साता नेपालमा आयोजना हुने एभीसी सेन्ट्रल जोन भलिबल च्याम्पियनसिपका तयारीका रुपमाभारतसँग तीन मैत्रीपूर्ण खेल खेल्ने भएको छ ।
नेपाल भलिबल संघले भारतसँग यही साउन ९, १० र ११ गते तीन मैत्रीपुर्ण खेल खेल्ने तय भएको जानकारी गराएको छ । संघले एभीसी सेन्ट्रल जोन भलिबल प्रतियोगिताको तयारीका लागि मैत्रीपूर्ण खेलको आयोजना गर्न उल्लेख गरेको छ । खेल लगनखेलमा रहेको नेपाली सेनाको कभर्डहलमा हुनेछ । नेपाली टोली अहिले सोही प्रतियोगिताको लागि दैनिक प्रशिक्षणमा व्यस्त रहेको छ । दोस्रो चरणमा १८ सदस्यीय टोलीले लगनखेलमा रहेको नेपाली सेनाको कभर्डहलमा प्रशिक्षण गरिरहेको छ ।
नेपाल भलिबल संघले गठन गरेको ५ सदस्यीय खेलाडी छनोट समितिले प्रारम्भिक चरणमा २५ खेलाडीको नामावली संघलाई पठाएको थियो । डच प्रशिक्षक हान एबिङले दोस्रो चरणमा गत असार १९ गते १८ खेलाडी छनोट गरिसकेका छन् । साउन तेस्रो या चौथो साता अन्तिम १२ सदस्यीय टोलीले टुङ्गो लाग्ने संघले जनाएको छ । एभीसी सेन्ट्रल जोन साउन ३२ गतेबाट भदौ ८ गतेसम्म सञ्चालन हुदैछ । च्याम्पियसिपमा ७ राष्ट्रले सहभागीता जनाउने छन् ।
