काठमाडौं (हाम्रो खेलकुद) – उपाधिका दावेदार तीन विभागीय टोली त्रिभुवन आर्मी क्लब, नेपाल पुलिस क्लब र नेपाल एपीएफ क्लबसँगै गण्डकी प्रदेश प्रथम प्रकाश दाहाल स्मृति प्रगतिशील युवा नेपाल कप राष्ट्रिय भलिबल प्रतियोगिताको सेमिफाइानलमा प्रवेश गरेका छन् ।

नयाँ बसपार्कस्थित ढोरपाटन क्लबको कोर्टमा बिहीबार भएको खेलमा आर्मीले जावलाखेल भलिबल प्रशिक्षण केन्द्रलाई ३–० को सोझो सेटमा पराजित गर्दै एक खेल अगावै अन्तिम चारमा पुग्न सफल भएको हो । एकपक्षीय खेलमा आर्मीले जावलाखेलमाथि २५–२३, २५–११ र २५–२१ को सहज जित निकाल्यो । यही समूहको खेलमा एपीएफले आफ्नो अन्तिम खेलमा जावलाखेललाई २५–१९, २५–२२ र २५–२३ को सोझो सेटमा पराजित गर्दै अन्तिम चारको यात्रा तय गर्न सफल भयो ।

शुक्रबार हुने समूहको अन्तिम खेलमा ढोरपाटनलाई पराजित गरे आर्मी समूह ‘ए’ को विजेता तथा एपीएफ उपविजेता बन्नेछ ।
समूह ‘बी’ बाट पुलिस र गण्डकीले पनि अन्तिम खेल अगावै अन्तिम चारको यात्रा तय गर्न सफल भयो । गण्डकीले बिहीबार दोहोरो सफलता हात पार्दै अन्तिम चारका पुग्न सफल भयो । पहिलो खेलमा गण्डकी प्रदेशले आयोजक प्रगगिशिल युवा नेपाललाई २५–१८, २५–१३ र २५–२३ ले पराजित गर्यो । बुधबार वर्षाले प्रभावित बनेको खेल बिहीबार हुदा गण्डकीले गल्कोटमाथि ३–१ को सेटमा जित हात पार्यो । पहिलो सेट १५–२५ ले गुमाएको गण्डकीले त्यसपछि लय समात्दै २५–२३, २५–२३ र २५–१९ को जित निकाल्यो ।

घरेलु भलिबल प्रतियोगिताको सर्वाधिक पुरस्कार राशीको प्रतियोगिताको तेस्रो दिन पुलिसले पुलिसले गल्कोट स्पोर्टस क्लब जापान टोकियो क्लबलाई ३–० को सोझो सेटमा पराजित गर्दै अन्तिम चारमा स्थान बनाउन सफल भयो । राष्ट्रिय खेलाडीको बाहुल्यता रहेको पुलिसले गल्कोटमाथि २५–१८, २५–१९ र २५–१५ को सहज जित निकाल्यो ।

अब शुक्रबार पुलिस र गण्डकीबीचको खेलले नै समूह ‘बी’ को विजेता र उपविजेता टुङ्गो लगाउनेछ । प्रतियोगितामा शुक्रबार समूह चरणका ३ खेल हुनेछ । लिग चरणको अन्तिम दिन आर्मी र ढोरपाटन, प्रगतिशील र गल्कोट तथा पुलिस र गण्डकी प्रदेशबीच खेल हुनेछ ।

प्रगतिशील युवा नेपाल को आयोजनामा जारी प्रतियोगितामा ८ टोलीको सहभागिता रहेको छ । समूह ‘ए’ मा एपीएफ र आर्मीसँगै ढोरपाटन स्पोट्र्स ट्रेनिङ सेन्टर र जावलाखेल भलिबल ट्रेनिङ सेन्टर छन् । समूह ‘बी’ मा आयोजक प्रगतिशील युवा क्लबसँगै नेपाल पुलिस क्लब, गल्कोट युवा क्लब र गण्डकी प्रदेश छन् । दुवै समूहका शीर्ष २ टोली अन्तिम चारमा प्रवेश गर्नेछन् ।

प्रतियोगिताको विजेताले ५ लाख रुपैयाँ हात पार्नेछ । दोस्रो हुनेले ३ लाख, तेस्रोले १ लाख तथा चौथो हुनेले ५० हजार रुपैयाँ हात पार्नेछन् । प्रतियोगिताको सर्वोत्कृष्ट खेलाडीले एक थान मोटरसाइकल हात पार्नेछन् । विधागततर्फ उत्कृष्ट स्पाइकर, ब्लकर, डिफेन्डर, सर्भर र प्रशिक्षकले जनही १०–१० हजार रुपैयाँ प्राप्त गर्नेछन् ।