काठमाडौं (हाम्रो खेलकुद) – दक्षिण एसियाली खेलकुद (साग) को १३ औं संस्करणको औपचारिक उद्घाटन समारोह आज त्रिपुरेश्वरस्थित दशरथ रंगशालामा हुँदैछ । साँझ ५ बजेदेखि सुरु हुने समारोहमा राष्ट्रपति विद्यादेवी भण्डारीको पनि उपस्थिति रहनेछ ।

सन् १९८४ मा नेपालले नै पहिलो पटक सागको आयोजना गरेको थियो । त्यसपछि सन् १९९९ मा आठौं संस्करणको आयोजना गरेको नेपालले तेस्रो पटक सागको आयोजना गर्ने जिम्मेवारी पाएको हो । समयमै पूर्वाधार तयार नहुँदा पटक-पटक मिति सरेपनि अन्तत: साग आयोजना हुने भएको छ । केहि महिनाअघि मात्र आएको राष्ट्रिय खेलकुद परिषदको नयाँ नेतृत्वले सागलाई विशेष प्राथमिकतामा राखेर कार्य गरेपछि साग समयमै सम्भव भएको हो ।

झन्डै १० हजारको संख्यामा सहभागीहरुले नेपालको कला संस्कृति लगायत अन्य विविध विषयमा आधारित रहेर प्रस्तुति दिने छन् । उद्घाटन समारोह झन्डै ३ घण्टा १५ मिनेट संचालन हुनेछ । उद्घाटनका लागि विभागीय टोलीहरु पुलिस, आर्मी र एपीएफसंगै विभिन्न विद्यालयहरुको टोलीले साथ दिनेछन् ।

सागमा ७ राष्ट्रका खेलाडीले २६ खेलमा प्रतिस्पर्धा गर्नेछन् । यसपटक सहभागी खेलाडीले ३१७ स्वर्ण, ३१७ रजत र ४८१ कास्यका लागि प्रतिस्पर्धा गर्नेछन् । यसक्रममा सबै राष्ट्र गरेर कुल २ हजार ७ सय १५ खेलाडीले प्रतिस्पर्धा गर्नेछन् । सागमा कुल अफिसियल संख्या ७ सय ६९ रहेको छ । नेपालबाट सर्वाधिक ५ सय ९६ खेलाडी रहेका छन् । नेपालले मात्र सबै २६ खेलमा प्रतिस्पर्धा गर्दैछ । सागअन्तर्गत काठमाडौंमा १९, पोखरामा ८ र जनकपुरमा १ खेल हुँदैछ । फुटबल र क्रिकेटतर्फ पुरुषको खेल काठमाडौं र महिलाको खेल पोखरामा हुँदैछ ।

उद्घाटन समारोहको मार्चपासमा नेपालको झन्डा ओलम्पियन तथा सागका स्वर्णधारी भारोत्तोलनका कमलबहादुर अधिकारीले बोक्नेछन् । दिप प्रज्वलनमा ओलम्पियन तथा तेक्वान्दोका कीर्तिमानी स्वर्णधारी दीपक विष्ट रहनेछन् । चार पटक स्वर्ण जित्ने कीर्तिमान राखेका दीपक हाल तेक्वान्दोका प्रशिक्षक समेत हुन् । तेक्वान्दोकै पुम्सेतर्फकी आयशा शाक्यले खेलाडीको तर्फबाट सपथ लिनेछिन् । निर्णायकको तर्फबाट ओलम्पिकमा सहभागी भइसकेका ब्याडमिन्टनका निर्णायक दीपक थापा रहनेछन् ।