काठमाडौं (हाम्रो खेलकुद) – नेपालले १३ औं दक्षिण एसियाली खेलकुदको दोस्रो दिन १५ पदक जित्दै सानदार सुरुवात गरेको छ । नेपालको लागि फलदायी बनेको सोमबार मार्सल आर्ट्सका खेल कराते र तेक्वान्दोले ७-७ पदक ल्याउँदा ट्रायथलनले एक पदक जित्यो ।

करातेमा स्वर्ण पदक जितेका खेलाडीहरु :

कराते (एकल काता) – मण्डेकाजी श्रेष्ठ

सोमबार बिहान भएको फाइनलमा मन्डेले पाकिस्तानका नियामतुल्लाहलाई हराउँदै स्वर्ण जित्न सफल भएका हुन् । मन्डेले २५.७२ अंक जोड्दा पाकिस्तानका प्रतिस्पर्धिले २४.९२ अंक मात्र जोडे ।

त्यसअघि सेमिफाइनलमा मन्डेले बंगलादेशका खेलाडीलाई पछि पार्दै फाइनलमा स्थान बनाए । मन्डेले २४ तथा बंगलादेशका खेलाडीले २२.८ अंक जोडे । श्रीलंकाका सोन्थारारासा बालुराज पाकिस्तानका नियामतुल्लाहसँग पराजित हुँदै कास्यमा सिमित भए ।

कराते (टिम काता, पुरुष) – मण्डेकाजी श्रेष्ठ, महसुस तामाङ, प्रविण मानन्धर

नेपालले फाइनलमा श्रीलंकालाई पराजित गरेको हो । नेपाली टोलीले फाइनलमा २५.५४ अंक प्राप्त गर्यो। यस्तै श्रीलंकाले २५.२८ अंकले पराजित गर्यो। त्यसअघि बंगलादेशलाई हराउँदै नेपाल अन्तिम दुईमा पुगेको हो । नेपाली टोलीले २५.१४ स्कोर गर्दा बंगलादेशले २४.८८ स्कोर गरेको थियो । श्रीलंकाले पाकिस्तानलाई हराउँदै अन्तिम दुईमा पुगेको थियो ।

कराते (टिम काता ,महिला)– निर्मला तामाङ, संगिता मगर, सरु कार्की

सातदोबाटोस्थ्ति नवनिर्मित कभर्डहलमा सोमबार भएको टिम कातामा पाकिस्तानलाई पछि पार्दै उपाधि जित्न सफल भएको हो । फाइनलमा नेपालले २४.८८ अंक तथा पाकिस्तानले २३.३ अंक जोड्न सफल भयो ।

कराते (५५ केजी) – लक्ष्मण तामाङ

करातेको कुमुतेमा ५५ केजी तौल समूहमा लक्ष्मण तामाङले स्वर्ण पदक जितेका छन् । उनले फाइनलमा बंगलादेशका मोहम्मद मुस्तफालाई १ –० को अन्तरले पराजित गरेका हुन् ।

कराते(८४ केजीमाथि)- विप्लवलाल श्रेष्ठ

दिवसले फाइनलमा पाकिस्तानका मोहमद बाजलाई पराजित गर्दै नेपालका लागि दशौँ स्वर्ण जितेका हुन् । त्यसअघि उनले श्रीलंकाका मग्गोनालाई टेक्निकलका आधारमा पराजित गर्दै फाइनलमा स्थान बनाएका थिए ।

कराते (४५ केजी मुनि) – कुसुम खड्का

कुसुमले फाइनलमा बंगलादेशकी माउन्जारा बोर्नालाई ३-२ ले पराजित गर्दै स्वर्ण जितेकी हुन् । त्यसअघि कुसुमले सेमिफाइनलमा श्रीलंकाकी सेनारथ आराचागीलाई ७-६ ले पराजित गर्दै फाइनलमा स्थान बनाएकी थिइन् ।

कराते (५० केजी मुनि) – अनु अधिकारी

११औं सागकी रजत पदकधारी अनुले उत्कृष्ट प्रदर्शनसँगै कराँतेमा अर्को स्वर्ण थपेकी हुन् । फाइनलमा अनुले श्रीलंकाकी डन पाउलु बादलेगीलाई ८-० ले पराजित गरेकी गर्दै स्वर्ण पक्का गरेकी हुन् । फाइनलमा विपक्षी खेलाडीलाई टेक्निकल नकआउट गरेकी उनले त्यसअघि पनि सोहि अनुसार जित हासिल गरेकी थिइन् ।

त्यसअघि सेमिफाइनलमा शुरुबाट नै आक्रामक रुपमा प्रस्तुत भएकी अनुले विपक्षी खेलाडीलाई एक अंक पनि दिएकी थिइनन् । उनले लगातार आठ अंक ल्याउदा बंगलादशकी फमिदा अख्तरले कुनैपनि अंक जोड्न सकिनन् ।