तेक्वान्दोमा मनिता र अप्सरा स्वर्णबाट चुके

काठमाडौं (हाम्रो खेलकुद) – मनिता शाही र अप्सरा कार्की १३ औं दक्षिण एसियाली खेलकुद (साग) अन्तर्गत बिहीबार भएको फाइनलमा भारतीय प्रतिद्वन्द्वीसँग पराजित हुँदै रजतमा सिमित भएका छन् ।

महिला ७३ केजीमुनि तौल समूहमा मनिता भारतकी मारिया रेगीसँग १५-० ले पराजित भइन् । मनिता पहिलो चरणमा ६-० ले पछाडी रहेकी थिइन् । दोस्रो चरणमा मारियाले दवदवा कायम गर्दै १३-० को अग्रता पुर्याइन् । त्यसअघि मनिताले श्रीलंकाकी सचिता आर्चाचिगेलाई २९-२ ले हराएकी थिइन् ।

त्यसअघि अप्सरा कार्की ६७ केजी मुनि तौल समूहमा फाइनलमा पराजित भएपछि रजतमा सिमित भइन् । फाइनलमा भारतकी रुचिका भावेसँग ८-५ ले पराजित हुँदै अप्सरा स्वर्णबाट चुकीन् । पहिलो राउण्डमा भारतले ४-० को अग्रता लिएको थियो । दोस्रो राउण्डको समाप्तिमा ७-२ को स्थिति रहेपनि अन्त्यमा अप्सराको पुनरागमन प्रयास सफल हुन सकेन ।