प्रकाश तिमल्सिना, काठमाडौं

प्रधानमन्त्री केपी शर्मा ओलीले सरकारबाटतर्फबाट बुधबार १३ औं दक्षिण एसियाली खेलकुद (साग) को पदक विजेता खेलाडीका लागि विशेष प्याकेज घोषणा गर्ने कार्यक्रम तय थियो । कार्यक्रममा भाग लिन पदक विजेता खेलाडी, प्रशिक्षक, संघका पदाधिकारी त्रिुपरेश्वरस्थित राष्ट्रिय खेलकुद परिषद् (राखेप)बाट प्रधानमन्त्री निवास बालुवाटार पुगेका थिए ।

निर्धारित समयभन्दा ढिला गरि सुरु भएको कार्यक्रममा प्रधानमन्त्रीले पदक विजेता खेलाडी सबैलाई बधाई दिए । सदा जस्तै उनले नेपाली खेलाडीको प्रशंसा गरे । पूर्ण रुपमा स्वस्थ नरहेका प्रधानमन्त्रीको आवाज पछाडि बस्ने खेलाडी पदाधिकारीले राम्ररी बुझेका थिएनन् । तर, पनि खेलाडी प्याकेज घोषणा सुन्नका लागि हलमा भरिभराउ थिए । सम्बोधनको अन्त्यमा प्रधानमन्त्रीले प्याकेजको घोषणा थाले । व्यक्तिगत खेलबाट उनको घोषण सुरु भयो । कास्य पदक विजेताले जनही ३ लाख रुपैयाँ, रजत पदक विजेताले ६ लाख रुपैयाँ र स्वर्ण पदक विजेताले ९ लाख रुपैयाँ घोषणा गर्दा सबै खुसी भए । ताली पनि त्यहि अनुरुपले बज्यो । ओलीले २ वा त्यो भन्दा बढी स्वर्ण पदक विजेता खेलाडीले प्रत्येक स्वर्ण वापत ११ लाख रुपैयाँ पाउने घोषणा गरे । यहाँ सम्म सबै ठिकै थियो ।

जब समूहगत स्पर्धाको घोषणा गर्ने बेला आयो त्यहाँ प्रधामन्त्रीदेखि मन्चमा रहेका खेलकुदका उच्च पदस्थ अधिकारी सबै अलमलमा देखिए । युवा तथा खेलकुद मन्त्री जगतबहादुर विश्वकर्मा, नेपाल ओलम्पिक कमिटी (एनओसी) का अध्यक्ष जीवनराम श्रेष्ठ र राखेप सदस्य सचिव रमेश सिलवालसँगको परामर्शपछि प्रधानमन्त्री ओलीले अर्को घोषणा गरे । समूहगत खेलका विजेता खेलाडीजे जनही ५ लाख रुपैयाँ र तीनका प्रशिक्षकले पनि ५ लाख रुपैयाँ पाउने घोषणा गरे । रजत र कास्य पदक विजेता, तीनका प्रशिक्षक, व्यवस्थापक र सम्बन्धित खेल संघले पाउने रकमको घोषणा भएन । प्रधानमन्त्रीले भने, ‘त्यो पछि मिलाउँदै जाउला । ’

तर, ठूलो हिस्सामा रहेको समूहगत खेलका रजत र कास्य पदक विजेतामा ठूलो अलमल देखियो । कति पुरस्कार रकम पाउने भन्ने उनीहरुले थाहा नपाई बालुवाटार छाड्नु पर्यो । सबैभन्दा ठूलो अलमल भने प्रधानमन्त्रीको सम्बोधनलाई लिएर कार्यक्रम सन्चालक समेत रहेका राखेप सदस्य सचिव सिलवालमा देखियो । प्रधानमन्त्रीले २ भन्दा बढी पदक जित्नेलाई प्रत्येक स्वर्ण बापत ११ लाख भने पनि सलिवालले २ भन्दा माथि जति वटा जितेपछि ११ लाख पाउने बताए । त्यसले गर्दा एक खालको अलमल देखिएको छ ।

प्रधामन्त्रीको सम्बोधन अनुसार गौरिका सिंहले हरेक स्वर्ण पदकको ११ लाखका दरले ४ स्वर्ण पदकको ४४ लाख, २ रजतको ६ लाखका दरले १२ लाख रुपैयाँ गरि ५६ लाख रुपैयाँ पाउनुपर्नेछ । त्यसबाहेक उनले समूहगत स्पर्धामा ३ वटामा कास्य पदक पनि जितेकी छन् । त्यसको घोषणा भएको छैन ।

प्रधानमन्त्रीका सल्लाहकार सूर्य थापाले २ वा त्यो भन्दा बढी स्वर्ण पदकका लागि प्रत्येकको ११ लाख रुपैयाँको दरले पाउने बताएका छन् । तर, सदस्य सचिवले भने त्यस्तो नभएको र कार्यविधि बन्दासम्म कुर्नुपर्ने बताए । ‘मैले बुझेको २ वा त्यो भन्दा बढी स्वर्ण पदक विजेता खेलाडीले ११ लाख रुपैयाँ पाउने हो,’ उनले भने,‘ यसको सबै टुंगो कार्यविधि बनेपछि हुनेछ । लिखितमा आएपछि मात्र भन्न सकिन्छ ।’ प्रधानमन्त्रीले सम्बोधनमा २ वा त्यो भन्दा बढी स्वर्ण जित्नेको हकमा प्रत्येकको ११ लाख रुपैयाँ भन्नु भएको हो नी भन्ने प्रतिप्रश्नमा सिलावलको जवाफ थियो, ‘यदि त्यो हो भने त झन् राम्रो हो ।’

कार्यक्रममा २ वा त्यो भन्दा बढी रजत वा कास्य पदक जित्नेको हकमा पनि सम्बोधनमा कुनै घोषणा गरिएन । यसपटक पुरस्कार राशीमा भने विगतमा भन्दा वृद्धि भएको छ । १२ औं सागमा भन्दा पुरस्कार राशीमा उल्लेख्य वृद्धि भएको छ । त्यति बेला व्यक्तिगत इभेन्टका स्वर्ण पदक विजेताले ५, रजत विजेताले ३ र कास्य पदक विजेताले २ लाख रुपैयाँ पाएका थिए ।

१३ औं सागमा २ वा त्यो भन्दा बढी एकल स्वर्ण जित्ने गौरिका एक्लो खेलाडी हुन् । त्यस्तै व्यक्तिगत र समूहगतमा गरि २ स्वर्ण पदक जित्नेमा ३ खेलाडी मात्र छन् । जसमा तेक्वान्दोकी आयशा शाक्य, करातेका मण्डेकाजी श्रेष्ठ र गल्फका सुवास तामाङ छन् । यी तीनै जनाले व्यक्तिगत खेल र समूहगत खेलमा एक एक स्वर्ण पदक जितेका हुन् । प्रधानमन्त्रीको सम्बोधन अनुसार यी ३ खेलाडीले व्यक्तिगततर्फको ९ र समूहगततर्फको ५ गरि १४ लाख रुपैयाँ पाउनेछन् ।

१३ औं सागको पदक तालिकाको दोस्रो स्थानमा रहेको नेपालले ५१ स्वर्ण, ६० रजत, ९५ कास्य गरि कुल २ सय ६ पदक जितेको थियो ।

यो पनि पढ्नुहोस् : ‘के हामीले देशकै लागि खेलेको होइन र?’