काठमाडौं (हाम्रो खेलकुद) – पूर्व नम्बर १ शिवराम श्रेष्ठले सूर्य नेपाल गल्फ टुरको पहिलो प्रतियोगिता सूर्य नेपाल सेन्ट्रल ओपनको तेस्रो दिन आठ स्ट्रोकको अग्रता लिएका छन् ।

गोकर्ण गल्फ क्लबमा बुधबारको खेल समाप्त हुँदा शिवराम चार अण्डर ६८ स्कोर जोड्दै कुल १० अण्डर २ सय ६ स्कोरसहित शीर्षस्थानमा छन् ।
उनलाई दोस्रो स्थानका रवि खड्काले तीन अण्डर ६९ स्कोरसहित कुल २ अण्डर २ सय १४ स्कोर जोडेर पछ्याएका छन् । रामे मगरले २ ओभर २ सय १८ तथा भुवन नगरकोटी र शुक्र बहादुर राईले तीन ओभर २ सय १९ स्कोर बनाएका छन् । दिपक थापा मगर र संजय लामाले चार ओभर २ सय २० स्कोर जोडेका छन् ।

एम्योच्योरतर्फ सागका दोहोरो स्वर्ण पदक विजेता सुवास तामाङले अग्रता लिएका छन् । उनले ५ ओभर २ सय २१ स्कोर गरेका छन् । रितेश तामाङ सुवासभन्दा ५ स्ट्रोकले पछि छन् । बिहीबार अन्तिम राउन्डको खेल हुनेछ ।

तीन दिने प्रतियोगितामा ४३ प्रोफ्रेसनल र तीन गल्फरले प्रतिस्पर्धा गरिरहेका छन् । प्रतियोगिताको विजेताले १ लाख २५ हजार नगद पुरस्कार पाउनेछन् । यस्तै उपविजेताले ८० हजार तथा तेस्रोले ५८ हजार पाउनेछन् । त्यसबाहेक शीर्ष २१ मा रहने खेलाडीहरुले पनि नगद पुरस्कार पाउनेछन् ।