धरान (हाम्रो खेलकुद) – स्थानीय प्रो बलभद्र राईले सूर्य नेपाल इस्टर्न ओपनको उपाधि जितेका छन् । शिवराम श्रेष्ठलाई ४ स्ट्रोकले पछाडी पार्दै बलभद्रले सूर्य नेपाल गल्फ टुर २०१९-२० सिजनको दोस्रो प्रतियोगिताको उपाधि जितेका हुन् ।

बलभद्रले उपाधिसहित १ लाख २५ हजार रुपैयाँ प्राप्त गरे । यो उनको करीअरको दोस्रो उपाधि हो । यसअघि उनले २००८-०९ को टुरमा वेस्टर्न ओपन उपाधि जितेका थिए । बलभद्रले घोपाक्याम्पस्थित निर्भाना कन्ट्री क्लबको कोर्षमा तेस्रो तथा अन्तिम दिन ३ अन्डर ६७ स्कोर जोड्दै समग्रमा ९ अन्डर २ सय १ को स्कोर बनाए ।

बलभद्रले पहिलो दिन १ अन्डर ६९ र दोस्रो दिन ५ अन्डर ६५ स्कोर जोडे । तेस्रो दिनको खेलमा फ्रन्ट नाइनको चौथो होलमा बोगीसहित १ ओभर ३७ खेलेका उनले ब्याक नाइनमा ४ बर्डीसहित ४ अन्डर ३० स्कोर बनाए । उनले ११ औं, १६ औं, १७ औं र १८ औं होलमा उत्कृष्ट पट गर्दै बर्डी लेखाएका थिए ।

शिवरामले तेस्रो दिन ६ अन्डर ६४ को उत्कृष्ट प्रदर्शन गर्दै दोस्रो स्थान हासिल गरे । सुरुवाती दुई दिन औसत प्रदर्शन गरेका उनले फ्रन्ट नाइनमा २ अन्डर ३४ तथा ब्याक नाइनमा ४ अन्डर ३० स्कोर जोडे । शिवरामले ७५ हजार रुपैयाँ प्राप्त गरे ।

एमेच्योरतर्फ निरज तामाङले बिहीबार १ ओभर ७१ स्कोर जोड्दै समग्रमा ४ अन्डर २ सय ६ स्कोरसहित उपाधि जिते । एमेच्योरतर्फ शुक्रराज राईले १३ ओभर २ सय २३ स्कोर जोड्दै दोस्रो स्थान हासिल गरे । तेस्रो स्थानमा १५ ओभर २ सय २५ स्कोर जोडेका सुन्दर राई रहे ।

समग्रमा व्यावसायिक गल्फर शुक्रबहादुर राई तेस्रो स्थानमा रहँदै ५५ हजार रुपैयाँ प्राप्त गरे । उनले तेस्रो दिन खराब प्रदर्शन गर्दै ४ ओभर ७४ स्कोर जोडे । एक समय उपाधिका दावेदारका रुपमा रहेका शुक्रले तेस्रो होलमा इगल प्रहार गरेपनि त्यसपछि लगातार चार होल बोगी खेपेका थिए । उनले समग्रमा १ ओभर २ सय ११ स्कोर बनाए ।

चौथो स्थान हासिल गरेका धनबहादुर थापा (२१४) ले ४५ हजार रुपैयाँ प्राप्त गरे । संयुक्त पाँचौ स्थानमा ६ ओभर २ सय १६ स्कोरसहित शिवकुमार माझी र सूर्यप्रसाद शर्माले जनही ३५ हजार ५ सय रुपैयाँ पाए । सातौं स्थान हासिल गरेका दिनेश प्रजापति(२१७) ले ३१ हजार पाए । संयुक्त आठौं स्थानका जयराम श्रेष्ठ (२१८) र रवी खड्काले २८ हजार जित्दा दशौं स्थानका संजय लामा र दीपक मगर (२२०) ले २३ हजार २ सय ५० रुपैयाँ जिते ।

शीर्ष २४ स्थानमा रहेका व्यावसायिक खेलाडीले नगद पुरस्कार हासिल गरे । विजयी खेलाडीहरुलाई सूर्य नेपाल प्रालिका मार्केटिङ म्यानेजर बालकिशन गुरुङ, धरान उपमहानगरपालिकाका मेयर तथा नेपाल गल्फ संघका उपाध्यक्ष तिलक राई लगायतले पुरस्कृत गरेका थिए ।

सूर्य नेपाल गल्फ टुर २०१९-२० अन्तर्गत दोस्रो प्रतियोगिताको कुल पुरस्कार राशी ७ लाख रुपैयाँ रहेको छ । सूर्य नेपाल प्रालिको प्रायोजन तथा नेपाल व्यावसायिक गल्फर संघको आयोजनामा हुने प्रतियोगितामा शुक्रबार हुने प्रो-एम इभेन्टमा व्यावसायिक खेलाडीले एमेच्योर खेलाडीसँग टोली गठन गरेर प्रतिस्पर्धा गर्नेछन् ।

अन्तिम दिनको तस्बिरहरु हेर्नुहोस :