काठमाडौं (हाम्रो खेलकुद) – नेपाल गल्फ संघले १३ औं दक्षिण एसियाली खेलकुद (साग) मा गल्फतर्फ पदक जित्ने खेलाडीहरुलाई शुक्रबार एक कार्यक्रमबीच सम्मान गरेको छ ।

सागमा गल्फतर्फ सुवास तामाङले एकलतर्फ स्वर्ण तथा शुक्रबहादुर राईले कास्य पदक जितेका थिए । त्यस्तै पुरुष टिम इभेन्टमा नेपालले स्वर्ण जित्दा महिलातर्फ कास्य हासिल गरेको थियो । पुरुषटिममा सुवास र शुक्रसँगै टंकबहादुर कार्की र निरज तामाङ रहेका थिए । महिला टिममा रविना श्रेष्ठ, कस्मिरा शाह र शुष्मा कोइराला रहेका थिए ।

सबै खेलाडीलाई संघले एक सेट टेलरमेडको गल्फ सेट प्रदान गरेको हो । उक्त सेटको बजार मूल्य झन्डै २ लाख रुपैयाँ रहेको छ । यस्तै संघले टोलीको प्रशिक्षकका रुपमा रहेका दीपक थापामगर र धनबहादुर थापा तथा व्यवस्थापकद्वय मदन राना र चुडाबहादुर (सीबी) भण्डारीलाई पनि सम्मान पत्र प्रदान गर्यो ।

संघले सागका दौरान टोलीको तयारीमा साथ दिने विभिन्न संघ तथा व्यक्तिहरुलाई पनि कार्यक्रममा सम्मान गर्यो । कार्यक्रममा नेपाल ओलम्पिक कमिटिका अध्यक्ष जीवनराम श्रेष्ठ, राष्ट्रिय खेलकुद परिषद्का उपाध्यक्ष पिताम्बर तिम्सिना तथा गल्फ संघका अध्यक्ष टासी घले, कोषाध्यक्ष किशन अग्रवाल लगायतले खेलाडी तथा प्रशिक्षकलाई पुरस्कृत गरे ।