एजेन्सी – विश्वभर फैलिरहेको कोरोना भाइरस कोभिड १९ को महामारीका कारण अष्ट्रेलिया र क्यानडाले जापानमा अबको चार महिनापछि हुने टोकियो ओलम्पिक २०२० मा आफ्नो खेलाडी नपठाउने निर्णय गरेको छ ।

कोरोना महामारीका कारण अष्ट्रेलिया र क्यानडाले जुलाई र अगष्टमा हुने टोकियो ओलम्पिक स्थगित गर्नुपर्ने माग गर्दै यथास्थितिमा ओलम्पिक आयोजना भए आफ्नो खेलाडी नपठाउने निर्णग गरेको हो । क्यानडाको ओलम्पिक कमिटी र पारा ओलम्पिक कमिटीले खेलाडीको स्वास्थ्य ठूलो विषय रहेको भन्दै यस्तो निर्णय गर्नुपरेको बताएका छन् ।

‘यो खेलाडीको मात्र स्वास्थ्यको विषय होइन । अब यो सर्वसाधारणको स्वास्थ्यको विषय बनिसकेको छ,’ क्यानेडियन ओलम्पिक कमिटी र पाराओलम्पिक कमिटीले भनेको छ । यसअघि विभिन्न देशको ओलम्पिक कमिटीले टोकियो २०२० ओलम्पिक स्थगित गर्नुपर्ने प्रस्ताव राख्दै आएपनि ओलम्पिक स्थगित नगरेका खेलाडी नपठाउने निर्णय गर्ने क्यानडा पहिलो राष्ट्र हो । यस्तै, अस्ट्रेलियाले पनि यस्तै अवस्थामा टोकियो ओलम्पिक आयोजना भए खेलाडी नपठाउने निर्णय गरेको छ ।

टोकियो ओलम्पिक जुलाई २४ देखि अगष्ट ९ सम्म हुने तालिका छ । आइतबार मात्रै अन्तर्राष्ट्रिय ओलम्पिक कमिटी आइओसीले टोकियो ओलम्पिकबारे चार सातापछि अन्तिम निर्णय गर्ने बताएको थियो । आईओसीले ओलम्पिक रद्द गर्न नसकिने भन्दै तत्कालका लागि स्थगित गर्ने वा एक वर्षपछि सार्ने भन्ने निर्णय गर्न चार हप्ताको समयसीमा राखेको छ ।