काठमाडौं (हाम्रो खेलकुद)– स्वदेशमा भएको १३औं दक्षिण एसियाली खेलकुद (साग) मा पदक विजेता खेलाडी, प्रशिक्षकले नेपाल सरकारले घोषण गरेको पुरस्कार अझै एक साता कुनुपर्ने भएको छ ।

कोष तथा लेखा नियन्त्रण कार्यलय (कोलेनिका) को सिस्टम डाउन भएका कारण खेलाडीले रकम पाउन अझै कुर्नुपर्ने भएको बताइएको छ । राष्ट्रिय खेलकुद परिषद् (राखेप) र युवा तथा खेलकुद मन्त्रालयबाट अनुमोदन भइसकेर अर्थ मन्त्रालयमार्फत आवश्यक बजेट पारित भइसकेपनि अहिले कोलेनिकाको सिस्टमका कारण ढिलाई हुने जनाइएको छ ।

साग सकिएको झन्डै ५ महिना वितिसक्दा पनि खेलाडीले पुरस्कार पाएका छैनन् । साग मंसिर १५ देखि २४ गते सम्म काठमाडौं, पोखरा र जनकपुरमा आयोजना भएको थियो । राखेपले पहिलो चरणमा खेलाडी तथा दोस्रो चरणमा प्रशिक्षकहरुको रकम खातामा जम्मा गर्ने यसअघि जानकारी गराएको थियो ।

राष्ट्रिय टिम तयारी समितिका निर्देशक तथा १३औ साग राष्ट्रिय टिम तयारी समितिको सचिव महेन्द्र राईले खेलाडी तथा प्रशिक्षकको नाम, खाता नम्बर र बैंक तथा शाखा नाम मिलेको अवस्थामा कोलेनिकाको सिस्टमबाट रकम प्राप्त गरिहाल्ने र बिग्रिएकाहरुको पनि हप्ता दिन भित्र पठाइसक्ने बताए । ‘हामीले सबै खेलाडी तथा प्रशिक्षकले पाउनुपर्ने रकम कोलेनिकामा पठाइसकेका छौं । सिस्टम डाउन भएकाले अहिले कुनै पनि खेलाडीले रकम पाएका छैनन् । सोमबार प्रयास गरेका थियौं । सिस्टम डाउन भएका कारण काम हुन सकेन । मंगलबार पुनः प्रयास पनि सफल भएन ।’

‘सिस्टम चलेको अवस्था र खेलाडीको सबै विवरण मिलेको अवस्थामा आधा घन्टा भित्रमा खेलाडीको खातामा रकम जम्मा भइसक्नेछ ’ राईले भने, ‘विवरण नमिलेकाहरुको पनि एक साताभित्र सच्याएर पुन कोलेनिका पठाउनेछौं । सर्भर चलेको अवस्थामा सबै खेलाडी तथा प्रशिक्षकको खातामा एक साताभित्र आफुले पाउनुपर्ने रकम जम्मा भइसक्ने छ । ढुक्क हुनुहोस् ।’

यसअघि मन्त्रालयले चैत मसान्तसम्म सबै खेलाडीको खातामा रकम जम्मा भइसक्ने बताएको थियो । राखेपले यसबीचमा खेलाडीको विवरण, बैंक खाता नम्बर संकलन गरिसकेको छ । मन्त्रालयले खेलाडीको पुरस्कारका लागि २४ करोड ७४ लाख रुपैयाँ निकाशाका लागि सिफारिस गरेको थियो । खेलाडीको खातामा मात्रै १८ करोड ३७ लाख रुपैयाँ जाने छ । बाँकी प्रशिक्षकको खातामा हाल्नुपर्नेछ । मन्त्रालयले खेलाडी, प्रशिक्षक गरेर ६२८ जनाको खातामा रकम जम्मा गर्नुपर्नेछ । जसमा ४ सय ९१ जना खेलाडी रहेका छन् ।

प्रधानमन्त्री केपी शर्मा ओलीले व्यक्तिगत स्पर्धाका स्वर्णपदक विजेताले ९ लाख, रजत जित्नेले ६ लाख र कास्य जित्नेले ३ लाख रुपैयाँ दिने घोषणा गरेको थियो । एक भन्दा बढी स्वर्ण जित्ने खेलाडीलाई ११ लाखका दरले पुरस्कार रकम दिने घोषणा गरिएको थियो । टिम इभेन्ट्समा स्वर्ण जित्ने खेलाडीलाई ६ लाख रजतले ४ र कास्य जित्नेले २ लाख रुपैयाँ पाउने भएका छन् । संशोधित कार्यविधिअनुसार सागमा स्वर्ण जिताउने मुख्य प्रशिक्षकले ५ लाख, रजतले ३ र कास्यले २ लाख रुपैयाँ पाउनेछन् । यस्तै, सहायक प्रशिक्षकमा स्वर्ण विजेताले ३ लाख, रजतले २ लाख र कास्यले १ लाख रुपैयाँ प्राप्त गर्ने कार्यविधिमा उल्लेख छ ।

सागमा जलपरी गौरिका सिंहले चार स्वर्ण १ रजत र १ कास्य जितेकी थिइन् । कराँतेका मन्डेकाजी श्रेष्ठले एकल र टिम कातामा स्वर्ण जितेका थिए । तेक्वान्दोकी आयशा शाक्यले दुई स्वर्ण जितेकी थिइन् । गल्फका सुवास तामाङले एकल र टिम इभेन्टस्मा स्वर्ण जित्न सफल भएका थिए । नेपालले १३औं सागमा ५१ स्वर्ण, ६० रजत र ९५ कास्य पदक गरि कुल २०६ पदक जितेको थियो । यो नेपाली साग इतिहासकै सबैभन्दा धेरै पदक हो ।