काठमाडौं (हाम्रो खेलकुद) – चार महिनाअघि स्वदेशमा भएको १३औं दक्षिण एसियाली खेलकुद (साग) मा पदक विजेता खेलाडीले नेपाल सरकारले घोषण गरेको पुरस्कार पाउन  थालेका छन् ।

राष्ट्रिय खेलकुद परिषद (राखेप) र खेलकुद मन्त्रालयले चैत मसान्तभित्र सागमा जित्न सफल भएका सबै ४ सय ३५ खेलाडीलाई खातामा रकम जम्मा गर्ने बताएपनि वैशाख पहिलो साता सकिनै लाग्दा खेलाडीले घोषित पुरस्कार पाउन थालेका हुन् । अधिकांश खेलाडीको खातामा भने पैसा आएको छैन ।

यसबीचमा बुधबार तेक्वान्दोतर्फ पेयर पुम्से जोडीमा पदक जित्न सफल सन्जीव कुमार ओझाले मात्रै आफ्नो खातामा रकम जम्मा भएको बताएका छन् । उनी सरकारले घोषणा गरेको पुरस्कार पाउने पहिलो खेलाडीसमेत बनेका छन् । सन्जीवले आयशा शाक्यसँग मिलेर सागमा स्वर्ण जितेका थिए । तर, आयशाले भने रकम पाएकी छैनन् । आयशा सागमा दोहोरो स्वर्ण जित्न सफल खेलाडी हुन् ।

हाम्रो खेलकुदसँगको कुराकानीमा सन्जीवले यस्तो विषम अवस्थामा पनि खातामा रकम जम्मा हुदाँ खुसी लागेको बताए । ‘यो अवस्थामा मैले खातामा रकम जम्मा होला भनेर सोचेकै थिइन । अहिले विश्व नै कोरोना महामारीसँग जुधिरहेको छ । राष्ट्र सेवामा रहेकाले म पनि यसको रोकथामबारेको प्रशिक्षणमा थिए । फर्किएर आउँदा मोवाइलमा हेरे एसएमएस आएको रहेछ । एकदमै खुसी भएँ,’ विभागीय त्रिभुवन आर्मी क्लबका खेलाडीसमेत रहेका सन्जीवले भने ।

‘मैले हाम्रो सर्कलका अरु खेलाडीहरुलाई पनि सोधे तर, कसैले पनि नपाएको बताए । ढिलो चाडो सबैले पाउछ होला । तर, म भाग्यमानी बने । सायद सागमा पदक जितेकोहरुबाट पुरस्कार पाउने म नै पहिलो खेलाडी होला ।’

दोहोरो स्वर्णधारी आयशाले ढिलो चाँडो रकम पाउनेमा आशावादी रहेको बताइन् । ‘मसँग जोडी बनाएर खेलेकाले पुरस्कार रकम पायो । मैले पाइन भनेर मलाई गुनासो छैन । सबैको आ–आफ्नो खातामा पैसा आउने हो । प्रक्रिया मिल्दै र मिलाउदै होला,’ आयशाले भनिन् ।

राष्ट्रिय टिम तयारी समितिका निर्देशक तथा १३औ साग राष्ट्रिय टिम तयारी समितिको सचिव महेन्द्र राईले सबै ४९१ जना खेलाडीको विवरण र पाउनुपर्ने रकम कोष तथा लेखा नियन्त्रण कार्यलय (कोलेनिका) मा पठाइसकेको र भोलि साँझ सम्ममा सबै खेलाडीले रकम पाइसक्ने बताएका छन् ।

‘हामीले सबै खेलाडीको विवरण, बैंक खाता नम्वर र पाउनुपर्ने रकम कोलेनिकामा पठाइसकेका छौं । तर, अझै पनि खेलाडीहरुले रकम पाइनसकेको बताएका छन् । सम्भवत भोलि साँझसम्ममा सबै खेलाडीको खातामा रकम जम्मा हुनेछ । केही बिग्रिएकाहरुले पनि एक दुई दिनमै पाउनेछ ।’ राईले भने, ‘कोलेनिकाले पनि एभरेस्ट बैंकबाट कारोवार गर्ने रहेछ । जम्मा दुई जना खेलाडीको एभरेस्ट बैंकको खाता रहेछ । एभरेस्ट बैंकको खाता भएकाले पाएको अरु बैंकको खाता भएकाले भोलि साँझसम्ममा पाइसक्ने छ ।’

यस्तै राईले १३औं सागमा व्यक्तिगतमा चार स्वर्ण, व्यक्तिगतमा २ रजत टिममा ३ कास्य जित्न सफल जलपरी गौरिका सिंहले ६२ लाख पाउने बताए । एक र टिममा स्वर्ण जित्न सफल कराँतेका मन्डेकाजी श्रेष्ठ, तेक्वान्दोकी आयशा शाक्य र गल्फका सुवास तामाङले समान २२ लाख रुपैँया नै पाउने र त्यत्ति नै रकम पठाइएको बताए ।

उनले खेलाडीहरुको कोलेनिकामा पठाउने काम सकिएको र अब प्रशिक्षकको पठाउने प्रक्रिया अघि बढ्ने बताए । साग मंसिर १५ देखि २४ गते सम्म काठमाडौं, पोखरा र जनकपुरमा आयोजना भएको थियो ।

मन्त्रालयले खेलाडीको पुरस्कारका लागि २४ करोड ७४ लाख रुपैयाँ निकाशाका लागि सिफारिस गरेको थियो । खेलाडीको खातामा मात्रै १८ करोड ३७ लाख रुपैयाँ जाने छ । बाँकी प्रशिक्षकको खातामा हाल्नुपर्नेछ । मन्त्रालयले खेलाडी, प्रशिक्षक गरेर ६२८ जनाको खातामा रकम जम्मा गर्नुपर्नेछ । जसमा ४ सय ९१ जना खेलाडी रहेका छन् ।

प्रधानमन्त्री केपी शर्मा ओलीले व्यक्तिगत स्पर्धाका स्वर्णपदक विजेताले ९ लाख, रजत जित्नेले ६ लाख र कास्य जित्नेले ३ लाख रुपैयाँ दिने घोषणा गरेका थिए । एक भन्दा बढी स्वर्ण जित्ने खेलाडीलाई ११ लाखका दरले पुरस्कार रकम दिने घोषणा गरिएको थियो । टिम इभेन्ट्समा स्वर्ण जित्ने खेलाडीलाई ६ लाख रजतले ४ र कास्य जित्नेले २ लाख रुपैयाँ पाउने भएका छन् ।

संशोधित कार्यविधिअनुसार सागमा स्वर्ण जिताउने मुख्य प्रशिक्षकले ५ लाख, रजतले ३ र कास्यले २ लाख रुपैयाँ पाउनेछन् । यस्तै, सहायक प्रशिक्षकमा स्वर्ण विजेताले ३ लाख, रजतले २ लाख र कास्यले १ लाख रुपैयाँ प्राप्त गर्ने कार्यविधिमा उल्लेख छ ।
सागमा जलपरी गौरिका सिंहले चार स्वर्ण ,व्यक्तिगतमा २ रजत, टिममा ३ कास्य जितेकी थिइन् । कराँतेका मन्डेकाजी श्रेष्ठले एकल र टिम कातामा स्वर्ण जितेका थिए । तेक्वान्दोकी आयशा शाक्यले दुई स्वर्ण जितेकी थिइन् । गल्फका सुवास तामाङले एकल र टिम इभेन्टस्मा स्वर्ण जित्न सफल भएका थिए ।

नेपालले १३औं सागमा ५१ स्वर्ण, ६० रजत र ९५ कास्य पदक गरि कुल २०६ पदक जितेको थियो । यो नेपालको साग इतिहासकै सबैभन्दा धेरै पदक हो ।