काठमाडौं (हाम्रो खेलकुद) – चेस ओलम्पियाडको नवौं चरणको समाप्तीपछि नेपाली पुरुष टोली समूह डीको दोस्रो स्थानमा उक्लेको छ । अजरबैजानको बाकुमा जारी ४२ औं ओलम्पियाडमा नेपाली टोली सोमबार जमैकालाई २.५–१.५ ले हराएपछि तालिकाको दोस्रो स्थानमा उक्लेको हो । नेपाल दक्षिण एसियाली राष्ट्र श्रीलंका र पाकिस्तानभन्दा अंकतालिकामा माथि रहेको छ । समूह डीमा श्रीलंका आठौं र पाकिस्तान नवौं स्थानमा छ । उक्त समूहमा साइप्रस शीर्षस्थानमा रहेको छ । महिला टोलीले भने दक्षिण एसियाली छिमेकी पाकिस्तानसँग २–२ को बराबरी खेलेको छ ।
फिडे मास्टर बिलमलाल श्रेष्ठ र क्षितिज भण्डारीले आ आफ्नो खेल जितेका थिए भने केशव श्रेष्ठ बराबरीमा रोकिएका थिए । सजिन महर्जन भने डामिनो डेभीसँग पराजित भएका थिए । २०१७ रटेड फिडे मास्टर बिलमले ब्रान्डन विल्सनलाई र क्षितिजजे फिडे मास्टर मालाकु लार्नेलाई माथ दिएका थिए । केशवले वारेन इलियोटसँग अंक बाँडे ।
महिलातर्फ शान्ता थापा र अस्मिता अधिकारी विजयी भएका छन् । शान्ताले गुल मेहक र अस्मिताले जेनोयिबा वासिफलाई पराजित गरिन् । सिन्दिरा जोशी घाजाला बेगम र सुजना लोहनी नाबी उल उमीसँग हारेका थिए । नवौं चरणको समाप्तीमा महिला टोलीको ५ अंक पुगेको छ । नेपाल बुद्धिचाल संघका महासचिव हेराकाजी महर्जनका अनुसार दसौं चरणमा नेपाली पुरुष टोलीले चाइनिज ताइपे र महिलाले लेसोथोको टोलीसँग प्रतिस्पर्धा गर्नेछ ।
