काठमाडौं (हाम्रो खेलकुद) – १३औं दक्षिण एसियाली खेलकुद (साग) का दोहोरो स्वर्णपदक विजेताद्वय करातेका मन्देकाजी श्रेष्ठ र गल्फका सुबास तामाङसहित ५ खेलाडी पल्सर स्पोर्ट्स अवार्डअन्तर्गत वर्ष उत्कृष्ट पुरुष खेलाडीको मनोनयनमा परेका छन् ।

यस्तै वर्ष पुरुष खेलाडीको मनोनयमा एथ्लेटिक्सका गोपीचन्द्र पार्की, तेक्वान्दोका कमल श्रेष्ठ र फुटबलका विकेश कुथु मनोनयनमा परेका छन् । यि पाँच मध्येबाट अवार्डको दिन एक जना विजेता घोषणा गरिनेछ । मनोनयनमा परेका मन्देकाजी र सुवास दोहोरो स्वर्ण तथा बाँकी तीन जना सागमा एक-एक स्वर्ण जित्ने खेलाडी हुन् ।

नेपाल खेलकुद पत्रकार मञ्चको खेलाडी छनोट समितिले २०७६ सालमा भएका राष्ट्रिय तथा अन्तर्राष्ट्रिय प्रतियोगितामा खेलाडीको प्रदर्शन तथा हात पारेको नतिजाको आधारमा मंगलबार मनोनयन सार्वजनिक गरेको हो ।

१७औं संस्करणको पल्स स्पोर्ट्स अवार्ड २८ पुसमा ललितपुरको सातदोवाटोस्थित कराते हलमा सेमि भर्चुअलमार्फत हुनेछ । मञ्चले यसअघि नै पिपल्स च्वाइस अवार्ड विधाको लागि ५ खेलाडीको मनोनयन सार्वजनिक गरिसकेको छ ।

पिपल्स च्वाइसको मनोनयनमा पौडीकी गौरिका सिंह, करातेका मन्देकाजी श्रेष्ठ, भलिबलकी अरुणा शाही, बास्केटबलकी सदिना श्रेष्ठ र फुटबलकी सावित्रा भण्डारी परेका छन् ।मनोनयनमा परेका खेलाडीको उत्कृष्टताको छनोट इ–सेवा मार्फत एसएमएम भोटिङ, फेसबुक लाईक, खेलकुद पत्रकार मञ्चका सदस्य र राष्ट्रिय संघका मुख्य प्रशिक्षकको भोटको आधारमा गरिनेछ ।

पारा, स्पेशल, लाइफटाइम एचिभमेन्ट, टिम अवार्ड र अन्तर्राष्ट्रिय खेल पत्रकार सम्मान कार्यक्रमकै दिन घोषणा गरिनेछ । यस बर्षदेखि पारा एथलिट अवार्डलाई ‘पारा एथलिट सम्मान’को रुपमा प्रदान गर्दैछौं ।

वर्षका उत्कृष्ट खेलाडी पुरुष, महिला र पिपुल्स च्वाइस बिधाका विजेताले पल्सर मोटरसाइकल प्राप्त गर्नेछन् । अन्य बिधाका विजेतालाई जनही ५० हजार रुपैयाँसहित आकर्षक गिफ्ट ह्याम्पर प्रदान गरिनेछ ।

पल्सर स्पोर्ट्स अवार्डको मुख्य प्रायोजक हंशराज हुलासचन्द एण्ड कम्पनी प्रालि रहेको छ । डिस मिडिया नेटवर्क लिमिटेडको सहकार्यमा हुने कार्यक्रमको अन्य प्रायोजकहरूमा सूर्य नेपाल प्रालि, रुस्लान फुटबल, इ–सेवा, केल्मी, टर्किस एयरलाइन्स, होटल क्राउन प्लाजा, रोयल सिंगी होटल, इमेजिङ नेपाल, राष्ट्रिय खेलकूद परिषद र नेपाल ओलम्पिक कमिटि रहेका छन् ।

वर्ष पुरुष खेलाडी मनोनयन

विकेश कुथु (फुटबल)

– १३औं सागमा फुटबलको टिम स्वर्ण
– आठौं राष्ट्रियमा आर्मी क्लबबाट स्वर्ण
– ए डिभिजन लिगमा दोस्रो
– विशाल गोल्डकप च्याम्पियन

गोपीचन्द्र पार्की (एथलेटिक्स)

– १३औं सागमा ५ हजार मिटर दौडमा स्वर्ण पदक
– आठौं राष्ट्रिय खेलकुदमा ५ हजार मिटर दौडमा स्वर्ण, १० किमि दौडमा कांस्य
– गणेशमान सिंह ओपन रोड रेसमा प्रथम
– चितवन नेसनल १५ किमि ओपन रोड रेसमा प्रथम

कमल श्रेष्ठ (तेक्वान्दो, पुम्से )

– १३औं सागमा एक स्वर्ण (एकल), एक कास्य (टिम)

– आठौं बृहत राष्ट्रिय खेलकुदमा तीन स्वर्ण
– नवौं कोरियन एम्बेसडर खुला राष्ट्रिय तेक्वान्दोमा दुई स्वर्ण

मन्देकाजी श्रेष्ठ (कराते)

– १३औं सागमा दुई स्वर्ण पदक (टिम काता र एकल)
– आठौं राष्ट्रिय खेलकुद, स्वर्ण पदक (एकल काता) र रजत (टिम काता)
– बंगलादेशमा भएको साफ च्याम्पियनसिपमा कांस्य पदक (एकल काता) र स्वर्ण पदक (टिम काता)

सुवास तामाङ (गल्फ)

– १३ औं दक्षिण एसियाली खेलकुदमा दुई स्वर्ण (व्यक्तिगत र समूह)
– पहिलो पटक नेपाललाई ऐतिहासिक स्वर्ण ।
– आठौं राष्ट्रिय खेलकुदको टिम स्पर्धामा रजत (आर्मीबाट, सुवास तामाङ, राहुल बिक र निश्चयजंग रायमाझी)
– फाल्डो सिरिज छनोट २०७६ मा च्याम्पियन, सूर्य नेपाल प्रिमियर लिग समग्रमा च्याम्पियन ।