काठमाडौं (हाम्रो खेलकुद) – माल्दिभ्सको राष्ट्रिय क्लब लिग च्याम्पियनसिप खेल्न पुगेकी प्रतिभा माली पहिलो खेलमै आफ्नो प्रभाव छोड्न सफल भएकी छिन् । नेपाली टोलकी नम्बर एक स्पाइकर प्रतिभा र कोपिला सम्मिलित मिस्किनागु इमेन जी ग्लुहुन क्लबले शुक्रबार माल्दिभ्सको राष्ट्रिय क्लब लिग च्याम्पियनसिपमा विजयी सुरुआत गरेको छ ।
दुई नेपाली रहेको ग्लुहुनले दुई अमेरिकी खेलाडी रहेको माल्दिभियन क्लबलार्ई २५–२२,२५–१७ र २७–२५ को सोझो सेटले हराएको उनीहरुको व्यवस्थापकका रुपमा त्यहाँ पुगेकी नेपाल भलिबल संघकी कोषाध्यक्ष सुनकेशरी मालीले जानकारी दिइन् । प्रतिभा सो खेलमा वमन अफ दी म्याच समेत घोषित भइन् ।
मालीका अनुसार प्रतिभा र कोपिला टोलीमा सेट हुन अझै बाँकी छ । उनले भनिन्,‘अझै तालमेल मिल्न बाँकी छ । आजको खेलमा पनि एकपछि अर्को सेटमा विस्तारै लय मिलेको थियो । आउने खेलमा अझै सुधार हुनेछ ।’ कोपालका लागि माल्दिभ्समा यो दोस्रो र प्रतिभाका लागि पहिलो अनुभव हो । मालीका अनुसार लिगमा माल्दिभ्सका ५ क्लबको सहभागिता रहेको छ । सबैले एकअर्कासँग खेलेपछि शीर्ष ४ टोलीबीच पुन समूह विभाजन गरि प्रतिस्पर्धा हुने आयोजकले जनाएको मालीले बताइन् । माल्दिभ्सको अर्को क्लबबाट खेल्नका लागि नेपाली टोलीकी उपकप्तान मञ्जु गुरुङ र अरुण शाही शुक्रबार काठमाडौंबाट त्यसतर्फ प्रस्थान गरेका छन् ।
शनिबार माल्दिभ्स पुग्ने उनीहरु फिस्दा क्लबबाट खेल्ने मालीले बताइन् । मालीका अनुसार त्यहाँको क्लबले दुई विदेशी खेलाडी टोलीमा राख्न पाउनेछ । प्रतिभा र कोपिलाले क्लबबाट कम्तीमा १ हजार अमेरिकी डलर पारिश्रमिक पाउनेछन् ।‘खेले वापत हजार डलर पाउनेछन्,’ मालीले भनिन्,‘टोलीले राम्रो स्थान ल्याएको खण्डमा बोनस रकम पनि थपिदिने क्लबले हामीलाई जानकारी गराएको छ । पहिलो पटक कोपिला र निमा श्रेष्ठ विदेशी क्लबबाट व्यवसायिक भलिबल खेलेका थिए ।
