काठमाडौं (हाम्रो खेलकुद) – नेपाली दुई राष्ट्रिय खेलाडी सम्मिलित मिक्सियामागु इजीले माल्दिभ्स महिला क्लब लिग च्याम्पियनसिपमा लगातार दोस्रो जित हासिल गरेको छ ।

स्पाइकर प्रतिभा माली लगातार दोस्रो खेलमा वमन अफ दी म्याच बनेपछि मिस्यिमागुले पोल स्टार क्लबलाई १२–२५, २५–२३, २५–७, २५–१७ ले हराएको छ । माल्दिभ्स क्लब लिग च्याम्पियनसिपमा एउटा टोलीले दुई विदेशी खेलाडी राख्न पाउने प्रावथान छ । प्रतिभासँगै अर्की राष्ट्रिय खेलाडी कोपिला उप्रेती पनि टोलीमा छिन् । विपक्षी टोलीमा दुई सर्वियन खेलाडी रहेको प्रतिभा र कोपालाको व्यवस्थापकका रुपमा गएकी नेपाल भलिबल संघकी कोषाध्यक्ष सुनकेशरी मालीले जानकारी दिइन् ।

राष्ट्रिय टोलीकी उपकप्तान मञ्जु गुरुङ र अरुणा शाही सम्मिलित अर्को टोली फेयस्दाले भने आज राती नै माल्दिभियन क्लबसँग प्रतिस्पर्धा गर्दैछ । त्यो माल्दिभियन क्लबलाई पहिलो खेलमा प्रतिभा र कोपिला सम्मिलित टोलीले हराएको थियो । प्रतियोगितमा महिलातर्फ पाँच क्लब र पुरुषतर्फ ६ टोलीले प्रतिस्पर्धा गरिरहेका छन् ।