एजेन्सी – युइएफए च्याम्पियन्स लिगको समूह ‘ई’ को खेलमा क्याटलान क्लब बार्सिलोना घरेलु मैदानमा पोर्चुगिज क्लब बेन्फिकासँग निराशजनक बराबरी खेल्दा जर्मन क्लब बायर्न म्युनिखले लगातार पाँचौ जित निकालेको छ ।
बल पोसेसन राख्दै बेन्फिकालाई दवावमा राखेपनि फिनिसिङमा चुक्दा बायर्नले बेन्फिकासँग गोलरहित बराबरी खेल्दै अंक बाँड्न बाध्य बनेको हो । क्याम्प नोउमा मंगलबार राति भएको खेलको पहिलो हाफका बार्सिलोनाका केही प्रहारलाई बेन्फिकाका गोलरक्षक ओडिसिस भ्लाचोडिमोले निस्तेज पारेका थिए ।
५७औं मिनेटमा मेम्फिस डिपाएले सुवर्ण अवसर पाएपनि सदुपयोग गर्न नसक्दा बार्सिलोना अग्रता लिनबाट चुक्यो । ६५औं मिनेटमा नुनेजको प्रहारले पोस्टको दिशा लिन नसक्दा बेन्फिकाले अग्रता लिन सकेन ।
६७औं मिनेटमा औसमाने डेम्वेलेले दुई डिफेन्डरलाई बिट गर्दै फ्रान्की डि जोङलाई दिएको पास र त्यसपछि मेम्फिस डिपाएले गरेको प्रहारलाई बेन्फिकाका गोलरक्षक ओडिसिस भ्लाचोडिमोले पञ्च गर्दै बचाए । खेलको अन्त्यतिर दुवै टोलीले केही मौका पाएपनि सदुपयोग गर्न नसक्दा बराबरीमा रोकिन पुग्यो ।
बराबरीपछि यो समूहबाट च्याम्पियन्स लिगको नकआउट चरणमा पुग्ने दोस्रो टोलीको टुंगो समूह चरणको अन्तिम खेलबाट नै लाग्ने भएको छ । बार्सिलोना र बेन्फिकाको नै दोस्रो टोलीको रुपमा नकआउट चरण पुग्ने सम्भावना रहेको छ । समूह चरणको अन्तिम खेलमा बार्सिलोनाले बायर्न म्युनिखसँग तथा बेन्फिकाले डेनामो किएभसँग खेल्दैछ । खेल ८ डिसेम्वरमा हुनेछ ।
यही समूहको अर्काे खेलमा नकआउट चरणमा स्थान पक्का गरिसकेको जर्मन क्लब बायर्न म्युनिखले डेनामो किएभलाई २–१ ले पराजित गरेको छ । बायर्नको जितमा रोबर्ट लेवान्डोस्की र किङ्सले कोमानले गोल गरे । घरेलु टोलीका डेनिस हरमासले एक गोल फर्काए । यो जितपछि अपराजित बायर्नको ५ खेलबाट १५ अंक पुगेको छ । डेनामो किएभ १ अंक जोडेर पुछारमा रहेको छ ।
समूह ‘जी’ को खेलमा लिलले साल्जवर्गलाई १–० ले तथा सेभियाले वल्फ्सवर्गलाई २–० ले पराजित गरेको छ । यो नतिजापछि यो समूहबाट चारै टोलीको नकआउट चरण पुग्ने सम्भावना जीवितै रहेको छ । अब समूह चरणको अन्तिम खेलबाट नकआउट चरण पुग्ने दुई टोलीको टुंगो लाग्नेछ ।
अन्तिम चरणमा सेभिया र साल्जवर्ग तथा वल्फ्सवर्ग र लिलबीच प्रतिस्पर्धा हुनेछ । यो समूहमा लिलको ८, साल्जवर्गको ७, सेभियाको ६ र वल्फ्सवर्गको ६ अंक छ ।
