काठमाडौं (हाम्रो खेलकुद) – नेपाल आयल निगम मनाङ–मर्स्याङ्दी क्लब र नेपाल आइस हिमालयन शेर्पाले कतार एअरवेज सहदि स्मारक ‘ए’ डिभिजन लिगको पहिलो हाफमा बराबरी खेलेका छन् ।
त्रिपुरेश्वरस्थित दशरथ रंगशालामा शनिबार भएको खेलमा दुवै टोलीले गोलका केही अवसर सिर्जना गरेपनि गोल हुन नसक्दा पहिलो हाफ गोलरहित बराबरीमा सकिएको हो । तेस्रो मिनेटमा पुजन उपरकोटीको फ्रिकिकमा ओलावाले ओलाडिपो अफिजको हेडर पोस्ट नजिकैबाट बाहिरिदा मनाङ अग्रता लिनबाट चुक्यो ।
४१औं मिनेटमा कप्तान विश्वास श्रेष्ठको फ्रिकिक क्रसबारमा लागेर फर्कदा हिमालयन शेर्पा अग्रता लिनबाट चुक्यो । त्यसमै रिवाउन्डमा अलरिच सिवेको हेडरलाई दिनेश राजवंशीले गोललाइनबाट बचाउँदै मनाङको संकट टारे । दोस्रो हाफ केहीवेरमा सुरु हुनेछ ।
मनाङ लगातार दोस्रो जितको खोजीमा रहँदा शेर्पा पहिलो जितको खोजीमा हुनेछ । मनाङले पहिलो खेलमा जावलाखेल युथ क्लबलाई १–० ले पराजित गर्दा शेर्पाले संकटासँग १–१ गोलको बराबरी खेलेको थियो ।
