काठमाडौं (हाम्रो खेलकुद)– नेपाली फुटबल टोलीले फ्रेन्ड्स अफ जापानलाई हराएको छ । एन्फा कम्प्लेक्स सातदोबाटोमा भएको च्यारेटी खेलमा नेपालले फ्रेन्ड्स अफ जापानमाथि १–० को जित हासिल गरेको हो । नवयुग श्रेष्ठले दोस्रो हाफमा गरेको गोलले नेपाल विजयी बनेको ।
खेलको अन्त्यतिर फ्रेन्ड्स अफ जपानले दबाब दिएपनि नेपाली टोली अग्रता जोगाउन सफल भएको थियो । नवयुगले ५८ औं मिनेटमा गोल गर्दै अग्रता दिलाएका थिए । विमल घर्तीमगरले पेनाल्टीको केही बाहिरबाट पेनाल्टी बक्समा खसालेको बललाई विक्रम लामाले पोष्टको दिने प्रयास गरेका थिए । विक्रमको प्रहारलाई विपक्षी गोलकिपरले रोकेपछि पूर्ण रुपमा नियन्त्रणमा लिन नसकेपछि नजिक रहेको नवयुगले सजिलै गोल गरे ।
नेपाल र जापानबीच दौत्य सम्वन्ध स्थापना भएको ६० औं वर्षगाँठको अवसरमा कलरबाथले अखिल नेपाल फुटबल संघ (एन्फा)को प्राविधक सहयोगमा च्यारेटी खेल आयोजना गरेको थियो । एएफसी सोलिडारिटी कप जितेर फर्केको तीन दिनपछिको मैदानपूर्ण खेलमा उत्रेको नेपाली टोलीलाई एन्फाले आजबाट विश्राम दिनेछ । टोलीका खेलाडी अब घरेलु फुटबलमा क्रियासिल हुनेछन् । त्यसमा कति खेलाडी झापाको सुरुगां गोल्डकप खेल्न जाने बताइएको छ ।
