पोखरा (हाम्रो खेलकुद) – मनाङ मस्र्याङ्दी क्लब र नेपाल पुलिस क्लबले कतार एअरवेज सहिद स्मारक ए डिभिजन लिगको पहिलो हाफको समाप्तीमा १–१ को बराबरी खेलेका छन् ।

लिगको पाँचौं चरणअन्तर्गतको पोखरा रंगशालामा भइरहेको खेलमा मनाङका लागि कप्तान अञ्जन विष्ट र पुलिसका लागि सुमन लामाले गोल गरेका थिए । खेलको १० औं मिनेटमा लिएको अग्रतालाई मनाङले जोगाउन सकेन । १० औं मिनेटमा रक्षक दिनेश राजवंशीको लामो पासमा अञ्जनले गोल गरेका थिए ।

पुलिसका गोलकिपर रोशन खड्का पेनाल्टी बक्स बाहिर निस्किएको मौकाको फाइदा उठाउँदै अन्जनले टोलीका गोल गरेका थिए । मध्यान्तर हुन १० मिनेट बाँकी रहँदा पुलिसका लागि सुमनले पेनाल्टी गोलमार्फत बराबरी खेल फर्काएका थिए । मनाङका रक्षक सरोज योञ्जन लामाले १८ यार्ड बक्सभित्र पुलिसका फरवार्ड निर कुमार राईमाथि खराब फाउल गरे । त्यसपछि पुलिसले पेनाल्टी पाएको थियो । सोही पेनाल्टीमार्फत सुमन गोल फर्काएका हुन् ।

दशरथ रंगशालामा शुक्रबार साविक विजेता मच्छिन्द्र फुटबल क्लब र त्रिभुवन आर्मी फुटबल क्लब अलग अलग खेलमा गोलरहित बराबरी खेलेपछि मनाङलाई शीर्षस्थानमा उक्लने मौका मिलेको छ । पुलिसलाई हराउन सकेको खण्डमा मनाङ शीर्षस्थानमा उक्लनेछ ।