एजेन्सी – लिग वान क्लब सन्डरल्यान्डमाथि सानदार जित निकाल्दै प्रिमियर लिग क्लब आर्सनल इंग्लिस फुटबल लिग (इएफएल) कप अर्थात कारवाओ कपको सेमिफाइनलमा प्रवेश गरेको छ ।

आर्सनलले घरेलु मैदानमा सन्डरल्यान्डलाई ५–१ को भारी अन्तरले पराजित गर्दै अन्तिम चारमा स्थान पक्का गरेको हो । आर्सनलको जितमा एडवर्ड एनकेटियाले ह्याट्रिक पुरा गर्दा निकोलस पेपे र चार्ली पाटिमोले समान एक गोल थपे । सन्डरल्यान्डका नाथन ब्रोडहेडले एक गोल गरे ।

इमिरेट्स स्टेडियममा मंगलबार राति गोलको वर्षा भएको खेलमा घरेलु टोलीले खेलको १७औं मिनेटमा एडवर्डको गोलबाट अग्रता लिएको थियो । सेडरिक सोराएसको प्रहारलाई सन्डरल्यान्डका गोलरक्षक लि वर्गले बचाउँदा रिवाउन्डमा एडवर्डले गोल गर्न सफल भएका थिए ।

२७औं मिनेटमा निकोलस पेपेले गोल गर्दै आर्सनलको अग्रता दोब्बर पारे । उनले सेडरिककै पासमा गोल गरेका थिए । ३१औं मिनेटमा नाथनले गोल गर्दै खेललाई २–१ को अवस्थामा ल्याए । उनले इलिओट इम्वलटनको पासमा गोल गरे ।

४९औं मिनेटमा एडवर्डले व्यक्तिगत दोस्रो तथा टोलीका लागि तेस्रो गोल गर्दै आर्सनलाई ३–१ ले अघि बढाए । उनले नुनो टाभारेसको पासमा गोल गरे । ५८औं मिनेटमा निकोलस पेपेको पासमा पासमा एडवर्डले ह्याट्रिक पुरा गरेपछि आर्सनल फराकिलो जिततर्फ अग्रसर बन्यो ।

इन्ज्युरी समयको थप गरिएको पहिलो मिनेटमा सब्सिच्युट चार्ली पाटिमोले गोल गर्दै गोल गर्दै आर्सनलको जित पक्का गरे । ८०औं मिनेटमा इमिल स्मिथ रोवीको स्थानमा मैदान छिरेका चार्लीले पेपेकै पासमा गोल गर्न सफल भएका थिए ।

अब आज (बुधबार) राति क्वाटरफाइनलका तीन खेलमा प्रतिस्पर्धा हुनेछ । ब्रेन्टफर्ड र चेल्सी, लिभरपुल र लेस्टर सिटी तथा टोटेनहम र वेस्टह्यामबीच राति १ः३० बजे प्रतिस्पर्धा हुनेछ ।