एजेन्सी – विश्व फुटबलमा पछिल्लो डेढ दशकयता वर्चस्व जमाउँदै आएका लिओनेल मेस्सी र क्रिस्टियानो रोनाल्डो दुवैका लागि सन् २०२१ मिश्रित रहयो ।

मेस्सी र रोनाल्डो दुवैले यस वर्ष क्लब परिवर्तन पनि गरे । मेस्सीले बार्सिलोनासँग लामो सम्बन्धमा पूर्णविराम लगाउँदै फ्रान्सेली क्लब पेरिस सेन्ट जर्मेनमा अनुबन्धित भए । यता रोनाल्डो पनि इटालीमा तीन वर्षको बसाइँपछि युभेन्ट्स छाडेर पूर्व क्लब म्यानचेस्टर युनाइटेड फर्किए ।

मेस्सीले क्लब फुटबलमा यस वर्ष बार्सिलोनाबाट कोपा डेल रे उपाधि जिते । तर अर्जेन्टिनाबाट भने उनले ऐतिहासिक सफलता हासिल गरे । पहिलो अन्तर्राष्ट्रिय उपाधि जित्ने क्रममा उनले टोलीलाई कोपा अमेरिका जित्दा कप्तानी प्रदर्शन गरे । उनले पिएसजी पुगेपछि १६ खेलमा ६ गोल गरेका छन् ।

यता रोनाल्डोका लागि पनि मिश्रित नतिजा रहयो । युभेन्टसले लगातार ९ वर्ष लिग जितेको सिलसिला रोकिएपनि दुई कप भने जित्यो । युरोमा रोनाल्डोको पोर्चुगल राउन्ड अफ १६ मा बेल्जियमसँग रोकियो । तर रोनाल्डोले अन्तर्राष्ट्रिय फुटबलमा सर्वाधिक गोलकर्ता बन्ने कीर्तिमान भने तोडे ।

तथ्यांकमा रोनाल्डो र मेस्सीको प्रदर्शन :

राष्ट्रिय टोलीमा :

मेस्सी – १६ खेल, ९ गोल, ५ असिस्ट (कोपा अमेरिका उपाधि)

रोनाल्डो – १४ खेल, १३ गोल, १ असिस्ट

क्लब फुटबल :

मेस्सी – ४५ खेल, ३४ गोल, १३ असिस्ट (कोपा डेल रे उपाधि)

रोनाल्डो – ५१ खेल, ३४ गोल, ६ असिस्ट (कोपा इटालिया र इटालियन सुपर कप)