काठमाडौं (हाम्रो खेलकुद) – कतार एअरवेव सहिद स्मारक ‘ए’ डिभिज लिग अन्तरगतको आठौं चरणको खेलमा आइतबार एक खेलमा मात्रै प्रतिस्पर्धा हुदा रुस्लान थ्री स्टार क्लब र हिमालयन शेर्पा क्लबबीच प्रतिस्पर्धा हुदैछ ।

खेल त्रिपुरेश्वरस्थित दशरथ रंगशालामा दिउँसो ४ः४५ बजे हुनेछ । थ्री स्टार शेर्पालाई हराउँदै अंक तालिका सुधार गर्न चहान्छ । थ्री स्टार ७ खेलबाट १० अंक जोडेर छैटौं स्थानमा रहेको छ । शेर्पालाई हराउन सके थ्री स्टारले शेर्पालाई नै पछि पार्दै पाँचौ स्थानमा उक्लनेछ ।

प्रतिबन्धपछि सेन्टरब्याक अनन्त तामाङ टोलीमा फर्कनेछ । फरवार्ड अन्सुमाना क्रोमाह कप्तान विक्रम लामा, आयुष घलान, सन्जोक राई, डोना थापा, हेमन्त थापामगर र गोलरक्षक प्रिसो टोलीमा रहेका छन् ।

यता, पछिल्लो तीन खेलमा अपराजित शेर्पा थ्री स्टारलाई स्तब्ध पार्दै शीर्ष चारको सम्भावना बलियो बनाउन चहान्छ । शेर्पा ७ खेलबाट ११ अंक जोडेर पाँचौं स्थानमा छ । थ्री स्टारलाई हराउन सके शेर्पाले तेस्रो र चौथो स्थानमा रहेको संकटा र आर्मीसँग अंक दुरी बराबरी गर्नेछ ।