एजेन्सी – डच मिडफिल्डर स्टेभन बर्गवाइनले इन्ज्युरी समयको थप गरिएको समयको अन्तिम दुई मिनेटमा दुई गोल गरेपछि टोटेनहम हटस्परले इंग्लिस प्रिमियर लिगमा रोमाञ्चक पूनरागमन जित निकालेको छ ।

टोटेनहमले खेलमा दुई पटक पछि परेको स्थिति उल्ट्याउँदै घरेलु टोली लेस्टर सिटीमाथि ३–२ को रोमाञ्चक पूनरागमन जित आत्मसात गरेको हो । टोटेनहमा लागि एक गोल ह्यारी केनले गरे । लेस्टरका पाट्सन डाका र जेम्स म्याडिसनले गोल गरेपनि टोलीको हार टार्न सकेनन् ।

किङ पावर स्टेडियममा बुधबार राति भएको रोमाञ्चक र प्रतिस्पर्धात्मक खेलको २४औं मिनेटमा डाकाको गोलबाट घरेलु टोली लेस्टरले सुरुवाती अग्रता लिएको थियो । ३८औं मिनेटमा ह्यारी केनले ह्यारी विंक्सको पासमा गोल गर्दै खेललाई १–१ गोलको बराबरीमा ल्याए ।

७६औं मिनेटमा म्याडिसनले हार्भे वार्न्सको पासमा गोल गर्दै घरेलु टोली लेस्टरलाई पुनः खेलमा २–१ को अग्रता दिलाए । त्यसपछि सब्सिच्युट फरवार्ड बर्गवाइन खेलमा चम्किए ।

७९औं मिनेटमा सर्जियो रिगुइलोनको स्थानमा मैदान छिरेका बर्गवाइनले इन्ज्युरी समयको थप गरिएको पाँचौ मिनेटमा माट डोहर्थीको प्रहारबाट आएको रिबाउन्डमा गोल गर्दै खेललाई २–२ गोलको बराबरीमा ल्याए ।

त्यसको दुई मिनेटपछि ह्यारी केनको पासमा बर्गवाइनले व्यक्तिगत दोस्रो तथा टोलीका लागि तेस्रो गोल गर्दै टोटेनहमलाई रोमाञ्चक पूनरागमन जित दिलाए । जिततर्फ अग्रसर लेस्टर अन्तिम दुई मिनेटमा सम्हालिन नसक्दा घरेलु मैदानमा पराजित हुन पुग्यो ।

यो जितसँगै टोटेनहम १९ खेलबाट ३६ अंक जोडेर पाँचौ स्थानमा उक्लिएको छ । टोटेनहम दुई खेल बढी खेलेको वेस्ट ह्यामभन्दा २ अंकले मात्रै पछि छ । पराजित लेस्टर १९ खेलबाटै २५ अंक जोडेर १०औं स्थानमा रहेको छ ।