एजेन्सी – इंग्लिस प्रिमियर लिगमा दोस्रो स्थानमा रहेको लिभरपुलले सहज जित दर्ता गर्दै शीर्षस्थानको म्यानचेस्टर सिटीसँगको अंक दुरी छोट्याएको छ ।

लिभरपुलले घरेलु टोली क्रिस्टल प्यालेसलाई ३–१ ले पराजित गर्दै शीर्ष स्थानको सिटीसँगके अंक दुरी छोट्याएको हो । लिभरपुलको जितमा भर्जिल भान डाइक, एलेक्स अक्सलेड चेम्वरलेन र फाविन्होले गोल गरे । घरेलु टोलीका ओड्सोनी इडुआर्डले एक गोल फर्काए ।

सेलह्रस्ट पार्कमा आइतबार राति भएको खेलको आठौं मिनेटमा भान डाइकको गोलबाट लिभरपुलले सुरुवाती अग्रता बनायो । उनले एन्ड्रिउ रोबर्टसनको पासमा गोल गरेका थिए । ३२औं मिनेटमा चेम्वरलेनले रोबर्टसनकै पासमा गोल गर्दै लिभरपुलाई पहिलो हाफमा २–० को अग्रता दिलाए ।

५५औं मिनेटमा ओड्सोनी इडुआर्डले गोल गर्दै खेललाई २–१ को अवस्थामा ल्याए । ८९औं मिनेटमा फाविन्होले पेनाल्टीमा गोल गर्दै लिभरपुलको जित पक्का गरे ।

जितसँगै लिभरपुलको २२ खेलबाट ४८ अंक पुगेको छ । एक खेल बढी खेलेको शीर्षस्थानको सिटीको ५७ अंक छ । लिभरपुल सिटीसँग ९ अंकले पछि छ । पराजित क्रिस्टल प्यालेस २२ खेलबाट २४ अंक जोडेर १३आं स्थानमा रहेको छ । यस्तै प्रिमियर लिगकै अर्काे खेलमा लेस्टर सिटी र ब्राइटनले १–१ गोलको बराबरी खेल्दा आर्सनल र बर्नलेले गोलरहित बराबरी खेल्दै अंक बाँडेका छन् ।