सुबास हुमागाईं, मस्कट

नेपाली राष्ट्रिय फुटबल टोलीका डिफेन्डर अनन्त तामाङले इन्डियन सुपर लिग (आइएसएल) क्लब स्पोर्टिङ क्लब इस्ट बंगालसँग सम्झौता गरेका छन् । यससँगै अनन्त आइएसएल क्लबमा अनुबन्धित हुने पहिलो नेपाली खेलाडी बनेका छन् ।

अनन्तले सिजनको अन्त्यसम्मका लागि छोटो सम्झौता गरेको बुझिएको छ । उनी अर्को सातासम्म भारत पुग्नेछन् । हाललाई छोटो सम्झौता भएपनि क्लबले उनलाई लामो समयदेखि पछ्याइरहेको थियो । यस सिजनको ४ खेल मात्र बाँकी रहँदा इस्ट बंगाल अंक तालिकामा पुछारबाट दोस्रो स्थानमा छ ।

रुस्लान थ्री स्टारका लागि ए डिभिजन लिग खेलिरहेका अनन्त गत महिना लिग दौरान चोट बोक्न पुगेका थिए । त्यसयता चोटका कारण रिह्याबमा व्यस्त रहेका उनले गत साता राष्ट्रिय टोलीको खेल पनि गुमाएका थिए । मौरिससविरुद्ध दशरथ रंगशालामा भएको दुवै खेलमा अनन्त विश्राममा रहेका थिए ।

अनन्तले यसअघि स्पेनको मार्बेला युनाइटेडमा प्रशिक्षण गरेका थिए । सुदूरपश्चिम फुटबल क्लबबाट राष्ट्रिय लिग खेल्दै घरेलु फुटबलमा प्रवेश गरेका उनको सन् २०१५ मा साफ यू-१९ च्याम्पियनसिप जित्दा चर्चा सुरु भएको थियो । नेपालले उपाधि जित्दा कार्यवाहक कप्तानका रुपमा विजयी पेनाल्टी प्रहार गरेका उनी त्यसयता नेपालको हरेक सफलतामा साथ रहँदै आएका छन् ।

सन् २०१६ को बंगबन्धु गोल्डकप, १२ औं दक्षिण एसियाली खेलकुद र सोलिडारिटी कपमा उनी टोलीका महत्त्वपूर्ण सदस्य थिए । सन् २०१९ मा १३ औं दक्षिण एसियाली खेलकुदको स्वर्ण जित्दा अनन्तले सानदार प्रदर्शन गरेका थिए । उनी साफ च्याम्पियनसिपमा उपविजेता बन्दा पनि सबै खेलमा सुरुवात गरेका थिए ।

अनन्तले भारतीय क्लबमा अनुबन्ध गर्न रुस्लान थ्री स्टार क्लबबाट फुकुवा पत्र लागिसकेका थिए । विदेशी क्लबमा आवद्ध हुने भएपछि क्लबले उनलाई फुकुवा गरेको हो ।