काठमाडौं (हाम्रो खेलकुद) – मनाङ- मर्स्याङ्दी क्लब र विभागीय नेपाल एपिएफ फुटबल क्लबले कतार एअरवेज सहिद स्मारक ‘ए’ डिभिजन लिग अन्तरगतको खेलको पहिलो हाफ बराबरीमा सकिएको छ । मनाङ र एपिएफले पहिलो हाफमा १–१ गोलको बराबरी खेलेको हो ।

मनाङका लागि कप्तान अन्जन विष्टको गोल गर्दा एपिएफका आशिष लामाले बराबरी गोल फर्काए । त्रिपुरेश्वरस्थित दशरथ रंगशालामा बिहीबार भएको खेलको २२औं मिनेटमा पुजन उपरकोटीको फ्रिकिकलाई गोलरक्षक युया कुरियामाले पञ्च गर्दै बचाए ।

३४औं मिनेटमा एडेलाजा सोमिडेको प्रहारलाई गोलरक्षक कुरियामाले डाइभ दिदै बचाउँदा मनाङ अग्रता लिनबाट चुक्यो । ३७औं अन्जन विष्टले गोल गर्दै मनाङलाई १–० को अग्रता दिलाए । गोलरक्षक विशाल सुनारले फालेको लामो बललाई अन्जनले गोलरक्षक अघि बढेको अवस्थामा उनको हेडरले जाली चुमेको थियो ।

४०औं मिनेटमा आशिष लामाले गोल गर्दै खेललाई १–१ गोलको बराबरीमा ल्याए । कप्तान नविन लामाको पासमा आशिषले डिफेन्डर नरेन्द्र चौधरीलाई बिट गर्दै गोलरक्षकलाई बिट गर्दै सहजै गोल गर्न सफल भएका थिए । त्यसअघि ३९औं मिनेटमा अन्जन विष्टको पासमा विमल रानाको वान भर्सेस वानको स्थितिको प्रहारलाई गोलरक्षक कुरियामाले सहजै नियन्त्रणमा लिए ।