एजेन्सी – एसी मिलान र इन्टर मिलानलाई पछि पार्दै नेपोली इटालियन सिरी ‘ए’ को शीर्षस्थानमा उक्लन सफल भएको छ । आइतबार राति लाजियोलाई २–१ ले पराजित गर्दै नेपोली शीर्षस्थानमा उक्लन सफल भएको हो ।

लाजियोको मैदानमा नेपोलीको महत्वपूर्ण जितमा लोरेन्जो इन्सिग्ने र फावियनले गोल गरे । घरेलु टोली लाजियोका पेड्रो रोड्रिग्वेजले एक गोल फर्काए ।

स्टेडियो ओलम्पियो रोमामा आइतबार राति भएको प्रतिस्पर्धात्मक र रोमाञ्चक बनेको खेलको पहिलो हाफ गोलरहित बराबरीमा सकिएको थिउो । ६२औं मिनेटमा लोरेन्जो इन्सिग्नेले गोल गर्दै नेपोलीलाई १–० को अग्रता दिलाए । उनले इल्जिफ इल्मासको पासमा गोल गर्न सफल भएका थिए ।

६९औं मिनेटमा लोरेन्जोले नै गोल गरेपनि भिएआरमा अफसाइड ठहरिदा गोलले मान्यता पाएन । ८८औं मिनेटमा पेड्रोले गोल गर्दै खेललाई १–१ गोलको बराबरीमा ल्याए । बराबरीतर्फ धकेलिएको खेलको इन्ज्युरी समयको थप गरिएको चौथो मिनेटमा फावियनले गोल गर्दै नेपोलीलाई महत्वपूर्ण जितसहित ३ अंक दिलाए । उनले लोरेन्जोकै पासमा गोल गर्न सफल भएका थिए ।

जितसँगै शीर्षस्थानमा उक्लिएको नेपोलीको २७ खेलबाट ५७ अंक पुगेको छ । समान अंक रहेपनि मिलान गोल अन्तरमा पछि परेको छ । इन्टर मिलानको ५५ अंक छ । पराजित लाजियो ४३ अंक जोडेर सातौ स्थानमा रहेको छ ।